Lungleia laboratory turah kut thlâk ṭan PWD-in estimate leh contractor an hre lo

Civil Hospital, Lungleia laboratory awmna tur in (building) sakna hmun tura tih chu June 17, Ningani khan JCB hmanga laih ṭan a ni. Hetih lai hian, Lungleia PWD hotute chuan, in sakna atana sum sen zat tur (estimate) leh in satu tur contractor an la hre lo.

In sak enkawltu tur PWD thuneitute chuan, in sak tur chhâwng khatna drawing leh structure design chu Aizawl aṭanga an dawn tawh thu sawiin, "A dung metre 30.8 leh a vâng metre 10.65-a lian tur a ni. Estimate kan la dawng tel lo a, chuvangin, pawisa ruahman zat kan la hre lo. Building sak tur hi architech ruahman ang chuan chhâwng nga thlenga sak theih turin structure duan a ni," an ti.

PWD hotute chuan, in satu tur chungchangah hriat an neih loh thu sawiin, "Tunah hian Lungleia contractor pakhat chu a hmunhma laih zâwl leh buatsaih hna thawk nghal tura tih a nih angin a thawk nghal mawlh mawlh tih chauh kan hria," an ti a; tender hmanga a satu thlan a nih leh nih loh chungchang pawh an sawi theih loh thu thuthar thehdarhtute zawhna chhángin an sawi.

Civil Hospital, Lungleia thuneitute sawi danin, mithiam hrang hrangin an zir chian hnuah laboratory building sakna tur hmun chungchangah hian thutlukna siam a ni.

Thuthar thehdarhtute'n Lungleia MLA leh mi dangte'n laboratory sakna tur hmuna an huam, damdawi-in tlâk lama ram âwl hman a nih loh chhan an zawhna chhángin Lunglei Civil Hospital hotute chuan, "Mithiam zawkte'n an zir chiannaah him loin an hria a. Laboratory hi chhâwng nga thlenga sak theih tura hisâp a nih avangin tuna lei laihna hmun hi thlan a ni," an ti.

Laboratory building tur sakna hmun tur hi nimin khan Lunglei HPC vice chairman Lawmawma Tochhawng, MLA hoin sorkar official-te'n an tlawh.

Lawmawma Tochhawng chuan, Lunglei Civil Hospital compound-ah laboratory changtlung tak, Mizoram chhim lam district palite tana ro tling tur sak hna bul ṭan theih a ni chu lawmawm a tih thu sawiin, "Tluang tak leh harsatna awm lo a peih fel thuai anih theih ka beisei," a ti a, building sak a nih theihna atana hmalatu Chief Minister leh Health Minister chunga a lawm thu a sawi.

HPC Vice Chairman chuan building hi OPD complex hnung lam ram ruaka sak tum hmasak phawt a nih thu sawiin, "Helai hmun hi engineer leh geologist-ten an zirchian hnuah him tawk loa an hriat avangin a sakna tur hmun hi sawn a ni. Tuna sakna hmun hi engineer leh geologist-ten an approve hnuah hmalak ṭan a ni.

Laboratory building hi Civil Hospital, Lungleia Trauma Centre sak mek bul chiah, Health department staff quarters hlui awmnaah sak tum a ni a, June 17, 2021 khan a hmun laih hna thawh ṭan a ni.

Tarlan tawh angin RT-PCR for Chhimbial-te'n PIL an thehluh kalzelah Gauhati High Court, Aizawl Bench chuan Mizoram sorkar ukil chu Hospital & Medical Education Director-in May 7, 2021-a lehkha a tihchhuah anga hmalak a nih dan thehlut turin a hriattir. Hospital & Medical Education Director hian Civil Hospital, Lunglei Medical Superintendent hi RT-PCR hi Microbiologist dept.-ah bun turin a hriattir a ni.