Covid-19 frontline workers training hawng

Prime minster Narendra Modi chuan nimin khan video conferencing kaltlangin PMKVY 3.0 (CSCM) hnuaia Covid-19 frontline worker training-na tur 'Customised Crash Course Programme for Covid-19 Frontline workers' a hawng.

He programme hi state 26-a training centre 111-ah kalpui a ni dawn a, Mizoramah chuan Mission Foundation Movement, Bawngkawnah kalpui a ni ang.

Labour, Employment, Skill Development & Entrepreneurship (LESDE) department leh Aizawl DC kaihhruai District Skill Committee kaltlangin training turte lak a ni dawn a, a thawh khatna atan mi 160 lak tur a ni. Batch khatah 20 zel awmin training kalpui tur a ni a, training chhung chu ni 21 a ni ang. Training zawhah Health department hnuaia damdawi-in hrang hrangah thla thum chhung (on job training) duty leh tura ruahman a ni.

PFMS kaltlangin zirlaite account-ah sorkar paipuiin stipend a thun dawn a, accidental insurance Rs. 2,00,000 thleng scheme-ah hian a tel. Programme kalpuina atan hian sorkar laipui chuan budget-ah cheng vbc. 275 a dah.