Coronavirus-in Mizoram a la thleng lo China aṭanga rawn hawte’n an vei lo

Health & Family Welfare (HFW) depart­ment chuan thuchhuah siamin, khawvel ram hrang hranga hri lêng mek Novel Coronavirus-in Mizoram a la thleng lo tih an tarlang. China aṭanga Mizo pahnih tun hnaia rawn hawte pawhin an vei loh thu, Health department hotute chuan an sawi.

Health department thuchhuah chuan, Coro­navirus chu World Health Organisation (WHO)-in Public Health Emergency of International Concern (PHEIC)-ah a puang tawh a, ram 27-ah hri kai an awm tawh thu a tarlang a, "Tun dinhmunah mi 16,831-ah a hrik hmuh tawh ni mah se, thi chu mi 362 chauh an la ni. India rama Kerela state-ah mi pahnihah a hrik hmuh ni tawh mah se, thihpui an awm lo. He hri léng hian Mizoram a la rawn lut lo a ni," a ti.

Mizoram sorkarin Coronavirus laka invenna kawngah theihtawp a chhuah tih sawiin Health department chuan, "January 30 khan Health Minister hoin state level meeting neih niin, Task Force din a ni a, Task Force hian hmalak ṭul­na apiangah hma a la chho mek. Sorkar laipuia Coronavirus hrilêng buaipuitute nen pawh ni tin inbe pawpin hmalakna report thawn ṭhin a ni," an ti a; Lengpui Airport-ah ram dang aṭanga khualzin lut, a bikin China aṭanga kalte chu ngaihven zual bik an nih thu an tarlang.

Health department tarlan danin, Mizoram sorkar ruahman angin Lengpui Airport leh Zokhawtharah Mizorama khualzin lut turte endik hna thawh mek a ni a, a ṭul angin hmun dangah pawh hmalak zel tum a ni. State level task force bakah, district tinah Coronavirus hri a awm palh pawha hmachhawn turin district level task force din tura hmalak a ni.

China ram chu sumdawng leh zirlai eng emaw zatin an tlawh pawh avangin Kolkata airport-a thlengte chu an hriselna endik hmasak ṭhin a ni a, airport screening chu hmun 21-ah kalpui mek a ni.

HFW department chuan, thuthang nazawng vanga chî-âi lo turin mipui an ngen a, “Social media lama mi pahnih, quarantine-a awm mek nia sawite pawh an damloh vang ni loin, fimkhur thu-hlaa páwn chhuak rih lo tura tih mai an ni a, chutih rualin, an chhungte pawh lo hrethiam tura ngen an ni,” an ti.

Mizo pahnih, páwna chhuak rih lo tura tihte chungchanga Vanglaini palai zawhna chhangin Health department hotute chuan, zirlai pahnih an ni a, China ram aṭanga rawn haw an nih avangin fimkhur thilah pawna chhuak rih lo tura tih an nih thu an sawi.

HFW Department hotute chuan, “Damlo an ni lo a, tun thlengin an hriselna a ṭha. Fimkhur a ngai a, mi zingah awm tam rih lo se tih avangin páwna chhuak rih lo tura tih an ni a, damlo anga damdawi-ina a hranpaa dah ngai an ni lo. Lehkhathiam an ni a, China aṭanga Mizorama an rawn haw tur thu pawh sorkar lam an rawn hriattir lâwk vek a ni,” an ti.