Niminah mi 68 sample endik
Zoram Medical College (ZMC) Covid-19 Laboratory-a June 1, Thawhṭannia endik mi 116 zinga mi 12-in Covid-19 hripui an vei laiin, mi 104-in an vei lo tih hmuh chhuah a ni. Nimin khan mi 68-te swab sample endik leh a ni a, nizanah result hriat hman beisei ni mah se, he thu ziah lai hian kan hre hman lo.
State Referral Hospital (SRH)-ah nimin zing khawvar hma khan Covid-19 vei hmuh thar mi 11 chu Kolasib district aṭangin dah luh an ni a, hripui vei hmuh thar zinga pakhat chu SRH-a awm sa a ni thung. Nimin vêk khan hripui vei rinhlelh thilah mi pariat dah luh an ni.
SRH-ZMC Covid-19 Bulletin tarlan danin, Covid-19 vei hmuh tharte leh rinhlelh thila dah luh tharte hi an hriselna a ṭha rih a, ICU-a enkawl ngai an awm lo. Hripui vei mek mi 12-te chu Isolation Ward-ah dah an ni a; Risk Ward-ah mi 19, Make Shift ICU/SARI Ward-ah mi pakhat leh Holding Ward-ah mi panga an awm mek bawk. June 1 tlai dar 5 leh nimin tlai dar 5 inkar (darkar 24 chhung) khan Mizoram luhka hrang hranga screening point-ah mi 1,285 enfiah (screen) an ni a, rapid antibody test (RAT) hmangin mi 623 endik an ni. Quarantine centre-a dah thar mi 866 an awm a, home quarantine-a dah thar mi 65 an awm thung.