Covid-19 hri thar a awm leh awm loh Mizoram sorkarin a bawhzui mek

Covid-19 chungchanga sorkar thupuangtu Dr Pachuau Lalmalsawma chuan, Mizoramah Covid-19 Delta variant bakah hri chhuak thar dang a awm leh awm loh hmu chhuak turin hmalak chhunzawm a nih thu a tarlang.

Dr Pachuau Lalmalsawma chuan, Covid-19 hrik chhuak thar Mizorama a awm leh awm loh finfiahna (whole genome sequencing) neih mek a nih thu sawiin, "Mizoram tan chuan Natio­nal Institute of Biomedical Genomics (NIBMG), Kalyani, West Bengal hi sorkar laipuiin a thawnna tura laboratory a ruat bik a ni," a ti.

Covid-19 thupuangtu tarlan danin, whole genome sequencing ti turin NIBMG-ah ṭum hnih sample thawn a ni tawh a, a hmasa ber atan kumin March 31, 2021-ah sample 69 thawn niin, Covid-19 hrik chhuak thar (mutated strain) hmuh a ni lo. Tun hnaia Covid-19 Delta variant hmuhna mi palite chu kumin February 4 leh March 11-a sample lâkte a ni a, enkawl dam vek tawh an ni.

Kumin April 17-ah RT-PCR positive sample 217 thawn leh a ni a, chumi zinga result an dawn tawh mi 76 aṭangin mi pali-ah Delta variant hmuh chhuah a ni.

Tunah hian ZMC Microbiology department chuan Covid-19 hrik thar awm leh awm loh enna atan sample 100 thawn tur a peih leh tawh a, a enfiahna laboratory-te ruahmannain courier service ruat bikte'n an rawn lam hun nghah mek a ni.