Nimin khan TNT-ah Covid-19 vei Mi 400 dawn hmuh chhuah a ni

Nimin khan Thutak Nunpuitu Team (TNT) hmun pui, Muanna Vengah Covid-19 swab sample endik rûnpui neih a ni a; nizan dar 7:00 thleng khan mi 657 en zingah hripui vei 386 hmuh chhuah an ni tawh a, endik hna kalpui zel a ni.

Vanglaini palai zawhna chhangin Covid-19 Medical Operational Team chairman Dr ZR Thiamsanga chuan TNT-a test runpui an neih chhan sawiin, "Vawiin (nimin) khan positive an awm takah chuan MOT leh IDSP-te'n kan tlawh a, an inkaidarh thei dawna kan hriat avangin test kalpui nghal rum rum kan rel a ni," a ti a, sorkarin a en zui zel tur thu a sawi.

Dr ZR Thiamsanga sawi danin, TNT-a awm hi mi 1,000 vel test an ni dawn; endik rûnpui hi nimin chawhma lam aṭang khan kalpui a ni a, nizan khan test zawh hman beisei a ni.

TNT hotute sawi danin, Covid-19 veite chu hmun hrana dah loin, an hmunah enkawl nghal an ni dawn a; TNT-ah hian mi 1,300 vel an awm mek a ni.

Swab sample endik hi Covid-19 Medical Operational Team leh mimal damdawi-ina laboratory technician ṭhenkhatin an buatsaih a ni.