RT-PCR bun a harsa lo - Mizoram BJP

BJP, Mizoram Pradesh hruaitute chuan June 19, Inrinni khan thuthar thehdarhtute an kâwm a; Mizoram sorkarin RT-PCR khawl bun a harsa angin sawi mah se, a harsat loh thu an sawi.

Mizoram BJP thupuangtu K Laldinthara chuan, RT-PCR bun a harsat thu Mizoram sorkarin an sawi reng avangin ZMC-in hun rei tak an hawhsak tawh College of Veterinary and Animal Husbandry (Vety College), Selesiha RT-PCR an hman dante tun hnaiah an enfiah thu a sawi a, "RT-PCR hi room zau pangngai ve deuhah chuan harsa lo taka bun mai theih niin a lang," a ti.

Swab sample lâkte vawn ṭhatna chungchanga harsatna awm nia sawi chu thil harsa nia a lan loh thu sawiin K Laldinthara chuan, "Sample an lâkte degree celcius -20 vela vawn reng ngai hi hautak hle anga tarlan pawh hi thu belhchian dâwl lutuk lo niin a lang," a ti a; Vety College-ah hian endik tur vawn ṭhatna khawl degree censius -80 thlenga tihvawh theihna eng emaw zat an kawl a, corridor-ahte an dah mai mai tih a sawi.

K Laldinthara chuan, swab sample endikna atan laboratory din turin BSL-II hman phal a ni tawh tih sawiin, "State khat sorkar ve riang ruang tan chuan hetiang laboratory neih hi harsa tur niin a lang lo. Vety College-a RT-PCR hi DNA aṭanga hri hmuh chhuahna a ni a, Covid hri hmuh theihna RNA hmang tur hian hmanraw pakhat chauh neih belh ngai," a ti.

Tun hnaia High Court-in Lungleia RT-PCR dinna tur chungchanga thupek a tihchhuah avangin chawpchilh takin RT-PCR bunna atana in sakna tur laih a nih thu sawiin K Laldinthara chuan, "State sorkarin ruahmanna a siam ang hi chuan a rang thei ang bera chhun zan zawma bei pawh ni se, hun a la duh rei dawn hle a ni," a ti a; Mizoram sorkar chu mipui bum tumah a puh a ni.