Mizoramah kum 2020-21 chhungin Lirthei 25,812 ziahluh thar a ni

Sorkar kum liam ta kum 2020-21 chhung khan Mizoram sorkar (Transport department)-ah lirthei 25,812 ziah luh thar a ni a, Aizawl district-ah ziah luh tam berin lirthei 17,119 (66.32%) ziah luh a ni.

Transport department hotute hnen aṭanga Vanglaini thu dawn danin kum 2020-21 chhunga lirthei chi hrang hrang ziah luh thar zingah two-wheeler a tam bera, lirthei ziah luh zawng zawng aṭanga 72.37% (18,682) a tling. Heng zinga 1,076 chu man chawi a hman tur (two-wheeler service) atana ziahluh a ni.

Two-wheeler 18,682 zinga 13,294 (71.15%) chu Aizawl district-a ziah luh an ni a; a dang chu Lunglei district-ah 1,439 (7.70%); Siaha district-ah 613 (3.28%); Champhai district-ah 821 (4.39%): Kolasib district-ah 910 (4.87%); Serchhip district-ah 712 (3.81%); Lawngtlai district-ah 547 (2.92%) leh Mamit district-ah 346 (1.85%) te an ni.

Transport department-in kum 2020-21 chhung hian lirthei chi hrang 20 an ziak lut thar a, heng zawng zawngah hian Aizawl district-a ziahluh a tam ber vek a ni.