Taxation-in thla hnih chhungin Chhiah cheng vbc. 125.99 an hmu

Taxation department chuan sorkar kum kal lai, 2021-22 ah April leh May thla chhungin chhiah chi hrang hrang aṭangin Rs. 1,25,99,01,806 an hmu tawh a, kum hmasa 2020-21 chhunga thla hmasa pahnih (April & May)-a hmuh aiin cheng vbc. 65 chuangin a tam zawk.

Vanglaini palaiin a kawmnaah Taxation department hotute chuan kum 2021-22 chhunga sorkarin chhiah hmuh zat tura a bituksak chu cheng vbc. 650 a nih thu an sawi a, "Boruak thar lutuk a awm loh chuan, sorkarin hmu tura bituk min siam zat hi kan hmu phâk lehin kan ring. Sumdawngte'n engkim dik taka an tih a pawimawh a, chu chu sorkar tan leh an tan pawh a ṭha a ni," an ti.

Goods & Services Tax (GST) chu sorkar laipui leh state sorkarin a zatve (50%)-a an insem avangin, online-a pêk dan phungah system backlog a awm ve theih avangin a huna hmuh nghal mai lohte a awm thei tih an sawi a; chhiah pêk tlai chu system-in automatic-in a chhût nghal mai zel niin an sawi.

Taxation hotute sawi danin, Taxation depart­ment-in chhiah an lâkna chu hlâwm lian parukah ṭhen a ni a, chumi chhungah chuan chhiah lâkna hrang hrang a awm. Taxation department hian nikum 2020-21 chhung khan an hmuh tura bituk cheng vbc. 600 chu an khûm a ni.

Taxation department-in chhiah an lakna hlawm lian parukte chu - state GST, other taxes on income & expenditure, tax on sales, trade, etc., taxes on goods and passen­ger, taxes and duties on commodities and services, registration & license fee-te a ni.