Covid-19 vangin mi 82 thi tawh

Covid-19 vangin June 19, Inrinni khan mi pathum an thi a, nimin khan tlai dar 5 thlengin mi pathum an thi leh bawk. Sorkar chhinchhiah angin, hripui vangin Mizo­ramah mi 82 an thi tawh.

Hripui vei State Refe­rral Hospital (ZMC)-a enkawl lai Lalnunziri (64) w/o T Lalzuitluanga, Saron Veng, Aizawl chu June 19, Inrinni zing dar 3:20 khan a thi a, chawhma dar 10 khan Saron Veng Presbyterian Kohhran Jubilee Hall kawtah vui a ni. Amah hi Covid-19 positive a ni tih May 17, 2021-ah hmuh chhuah a ni a, May 23-ah SRH-ah dah luh a ni.

Lalramliani (59) w/o Lalzuala Varte, Salem Veng, Aizawl chu June 19, Inrinni tlai dar 4:30 khan Covid-19 vangin SRH-ZMC-ah a thi a, zanah lumen niin, nimin chawhma dar 10 khan vui a ni. Amah hi Covid-19 positive a nih thu May 24, 2021 khan hmuh chhuah a ni a, SRH-ZMC-ah dah luh nghal a nih thu sorkar thuchhuakin a tarlang.

Inrinni vêk khan Rualtinkhuma (48) h/o Rohmingthangi, Kanan Veng, Aizawl pawh zan dar 9:30-ah hripui vangin SRH-ZMC-ah a thi a, nimin khan vui a ni. Amah hi Covid-19 positive a ni tih June 11, 2021 khan hmuh chhuah a ni a, damdawi-inah enkawl nghal a ni.

Nimin khan zing dar 1 (Inrinni zan)-ah Erichiya Devi (52) w/o Zanara, Muanna Veng, Aizawl chu Covid-19 vangin SRH-ZMC-ah a thi a, nimin chhun dar 12 khan vui a ni. Amah hi Covid-19 positive a ni tih June 3, 2021-ah hmuh chhuah a ni a, June 6-ah SRH-ZMC-ah dah luh a ni.

Covid-19 vei SRH-ZMC-a enkawl lai Dr Laltinchhawna (72) h/o Zadingliani, Zarkawt pawh nimin zing dar 1:45 khan a thi a, nimin chhun dar 12 khan Zarkawt Kohhran Centenary Hall-ah vui a ni. Amah hi Covid-19 positive a ni tih June 3, 2021-ah hmuh chhuah a ni a, June 8-ah SRH-ZMC-ah dah luh a ni tih sorkar thuchhuakin a tarlang.

Nimin vek zing dar 6:30 khan K Biaksiami (70) w/o R Rumliana, Edenthar Veng, Aizawl chu hripui vangin a thi a, nimin chhun dar 12 khan Edenthar Venga kohhran hall-ah vui a ni. Amah hi Covid-19 positive a ni tih June 3, 2021 khan hmuh chhuah a ni a, SRH-ZMC-ah laka enkawl nghal a ni.