ZPM Ṭhalaiin ICU siam belh phût : 'ZMC-a hlawh la thawktu 66 hmun dangah an awm'

ZPM Ṭhalai chuan thuchhuah siamin, Zoram Medical College (ZMC)-ah tun dinhmunah chawhrualin ni tin ICU-ah damlo 34 an awm ang a nih thu an tarlang a, ICU siam belh turin Mizoram sorkar an phût a; ZMC-a hlawh la mi 66 chu hmun dangah an thawk mek tiin koh kir an phût bawk.

SRH-ZMC ICU bikah thawk tura inpe (volunteer)-te nen nurse 50-in damlote an enkawl mek tihna a nih thu tarlangin ZPM ṭhalai chuan, "Kan boruak kal mek bakah, thawktu zat leh ICU damlo awm zat ngun taka chhûtin, ICU dang mamawhna a sang hle a, siam belh thuai turin thuneitute kan phût a ni," an ti.

ZPM ṭhalaite chuan, volunteer-te thiamna leh hnathawh phú tâwk hlawh tawktarh thei lo khawpa retheia sorkar a awm laia ZMC-a hlawh la thawktu mi 66-te hmun dangah an thawk tih an tarlang a, "Hlawh tlêm tê tawktarha volunteer kan zawn reng lai hian ZMC-a hlawh la, mahni hlawh lâkna hmuna thawk loa hmun danga thawk heti zozái hi khawiah nge an awm?" tiin, nurse-te chu ko lêt turin sorkar an phût a ni.