Covid-19 do nan thilpek hlân

Mipui thlan tlin ram hruaitu ṭhenkhatte'n Covid-19 dona kaih-hnawihah an bial chhungah ṭanpuina an pe chhuak chhunzawm zel.

Health minister Dr R Lalthangliana chuan Hnahthial Hospital-a hman tur bungruate leh village task force-te hman tur PPE eng emaw zat a pe a, chungte chu June 18 khan Hnahthial damdawi-in thlenpui niin, khua/veng hrang hrangah sem a ni ang.

Minister of state K Lalrinliana chuan June 18 khan a bial chhunga Bairabi South VTF-te hnenah in lama inkhung hrang mekte ṭanpui nan buhfai ip 15 a pe a; Kolasib Project Venga mini stadium sak mek leh Kolasib khaw chhunga DRDA hnuaia hna kalpui mekte a endik bawk.

ZPM Legislature Party leader Vanlalhlana pawhin June 18 khan a bial Aizawl North-I huam chhunga veng pathum - Bawngkawn Chhimveng, Chaltlang Lily Veng leh Selesih local task force-te a tlawh a, ṭanpuina pawisa a hlân a ni.

AMC Ward No. VIII councillor Christina Roluahpuii Sailo chuan Inrinni khan an ward chhunga Covid-19 veite an awmna hmunah tlawhin, thawktute kaltlangin thilpek a hlan.