SCERT-in academic Work Plan tlangzarh

State Council of Educational Research and Training (SCERT) chuan primary school leh middle school zirtirtute'n zirlaite an kaihhruaina tur Academic Work Plan for Home Learning 2021-22 an tlangzarh a, scert.mizoram.gov.in ah PDF-in dah niin, download theih a ni.

Academic Work Plan for Home Learning 2021-2022 hi zirtirtute an zirtirnaa puitu tura siam a ni a, zirlaibu (textbook) aṭanga duan a ni. Work plan-ah hian zirlaibua chapter tin aṭanga zir tur bituk (learning outcome), zirtir dan tur, naupangte'n an tih tur leh chapter tinte zir hun tur bithliah a ni.

SCERT kaihhruainain a tarlanah chuan, 'Work plan hi zirtirtute puitu tura duan a nih angin, zirtirtu chuan naupangte zirtirna atan an hmang ṭangkaiin an zâwm tur a ni. Tih tur (exercise)-te hi naupangte'n chapter an zir zawh apiangin an ti zel ang. Project work leh activity-te chu tihtir ngei tur a ni a, chu chuan mark a keng tel ngei bawk tur a ni,' a ti.

Unit/chapter pahnih zel an zir zawhah naupangte chu test neihtir tur a ni a, zirtirtute chuan naupang nu leh pate (an chenpuite) chu an fate lehkha zirna leh hmasawnna kawnga mawhphurtu pawimawh tak an nih thu leh hemi work plan-te hmang hian an fate lo enpui ṭhin tura beisei an ni tih an hriattir tur a ni.

Academic Work Plan-ah hian unit, chapter leh chapter thupui, learning outcome (zir chhuah tur bituk), zirtirna kalpui dan tur, test kalpui dan tur (oral & written test), assignment/project tih dan tur te, activity - ziaka chhan tur zawhnate leh chapter zir hun chhung tur bitukte a awm.