Covid-19 zangnadawmna scheme-ah Task force member 25,740 inziak lut tawh

Mizoram sorkarin local task force (LTF) leh village task force (VTF) mi leh sa, an duty-na aṭanga Covid-19 káia thi zui ta an awm a, an chhungte'n zangnadawmna an dawn theihna tura a duan LTF/VTF Covid-19 Ex-Gratia Lumpsum Compensation Scheme-ah mi 25,740 an inziak lut tawh.

Sorkar thuchhuah tarlan danin, Task Group on Insurance rawtna angin, Mizoram sorkarin Ex-Gratia Lumpsum Compensation Scheme a tihchhuah tawh chu a nihna ang taka hman a nih theih nan hmalak a ni.

Ex-Gratia Lumpsum Compensation Scheme-ah hian Aizawla LTF 83 aṭangin mi 4,273 an inziak lut tawh a, zawh a ni tawh. VTF 740 aṭangin mi 21,467 ziah luh a ni tawh a, zawh a la ni lo.

Scheme hnuaiah hian LTF/VTF member, an duty-na aṭanga Covid-19 kái, hripui vanga thi zui an awm chuan an chhungte hnenah cheng nuai 20 pek theih a ni a; scheme hian September 30, 2021 thleng a awh dawn.

LTF/VTF member, scheme-a la inziak lut lote chu a rang lama inziak lut tura ngen an ni a; June 21, 2021 tlai dar 5 thleng inziah luh theih tura ruahman niin, June 21 hnu lamah chuan inziak lut turin Task Group phalna lâk hmasak a ngai tawh dawn a ni.

Zangnadawmna dil dan tur
• Nominee-te'n an VTF/LTF data entry siamtute hriatpuinain dilna form siam sa hmangin dilna an thehlut tur.

• Dilnate chu mahni awmna district bawrhsap hnenah thehluh tur a ni. DC-in a lo endik ang a, document zawng zawngte chu a dik ngei a ni tih a finfiah ang.

• Dilna endik tawh chu Task Group on Insurance Chairman (Addl. Secretary, Finance (EA), Govt of Mizoram) hnenah thehluh tur a ni.