Loneitute hamṭhatna tur sawiho

Agriculture leh Irrigation & Water Resources (IWR) minister C Lalrinsanga hoin June 18 khan department pahniha hotute'n loneitute hamṭhatna tura hmalakna an neihte leh harsatnate an thlirho a; kângmeiin thlai a tihchhiat neitute hnena zangnadawmna pek theih dan tur an sawiho bawk.

C Lalrinsanga chuan, Covid-19 léng avangin duh angin hmalakna kalpui theih ni lo mah se, department chuan a theih ang angin loneitute hamṭhatna tur a kalpui thu a sawi a, "Mizorama loneitute tana central scheme kumina kalpui tur Pradhan Mantri Kisan Urja Surasha evam Utthaan Mahaabhiyan (PM-KUSUM) hi nikum lamah kalpui kan tum a, mahse, a funding pattern 50:30:20 chu Mizoram sorkar dinhmun ngaihtuahin kalpui a harsa," a ti.

Mizoram thar chhuah tihpun theihna tur scheme a nih avangin funding pattern pawm turin hmalakna an kalpui thar thu leh state sorkar sum thawh tur chu Chief Minister-in a remtihsak tawh thu Minister chuan a sawi.

PM-KUSUM thawh khatnaah hian loneitu 200 tan leh a thawh hnihnaah loneitu 2,000 tan nizung chakna (solar energy) hmanga tui pump-na khawl kalpui tum a ni.

Meeting-a tarlan danin, kumin April thlaa Mizoram hmun hrang hranga kângmei chhuakah thlai/thei cheng vbc. 11.36 hû a kâng chhia a; tun hnaia fall armyworm (FAW)-in Mizorama vaimin chìnna zawng zawng hectare 3,441 aṭangin hectare 1,318 a khawih a, loneitu chhungkua 6,834 a tibuai a ni.