Pune aṭanga rawn haw mek Mizo nula rél aṭangin tla hlum

Maharashtra aṭanga Mizorama rél hmanga rawn haw mekte zinga Marlia Vanlal­hma­ngaihzuali (26), Keifang chu June 1, Thawhṭanni zan dar 11 vel khan West Bengal state chhungah a chuanna rél aṭangin a tla a, zanlai pelh hnu, dar 12:30 vel khan a hliam tuar loin a thi.

Thu dawn danin, Marlia Vanlalhmangaihzuali hi Shivneri, Pune, Maha­rashtra-a awm a ni a; West Bengal state chhung, Malda aṭanga hla vak lo Samsi Railway Station thlen hma deuhah rél tlân lai aṭangin a tla palh a, rél enkawltute hriattir a nih hnuah rél chu dintir a ni. Marlia-i tla chu zawng zuiin, nikhaw hre loin an hmu a, réla doctor chuang vete'n an bawihsáwm nghal a; mahse, a hliam tuar loin zanlai dar 12:30 velah a thi a ni.

Pune Mizo Welfare Association secretary Henry Chhingkhuma hnen aṭanga Vanglaini thu dawn danin, Marlia Vanlalhmangaihzuali ruang hi dan anga postmortem leh police lamin an tihfel ngaite a awm a; chumi chhunga lo buaipui zui ve turin Mizo chuang ve dangte zinga mi panga - Joseph V Renthlei, Dr Lawrence Lalfelfamkima, Va­bei­­rahnei, John T Laldingliana leh Lalsang­puia te chu rél aṭangin an chhuk ve nghal.

Marlia Vanlalhma­ngaihzuali ruang hi nimin khan Malda-ah postmortem niin, chawhnu lamah an zo a, Malda aṭangin Siliguri thleng ambulance-a phurh a nih hnuah, Siliguri aṭang hian ambulance lian zawkin Mizoramah phurh leh tur a ni a; ambulance-ah hian Mizo tlangval pangate'n an rawn zui dawn nia thu dawn a ni.

Pune aṭang hian mi 700 chuang an rawn haw mek a, Mumbai leh Maharashtra state chhung khaw danga Mizo ṭhahnem tak telin, Mizo bik hi mi 1,360 vel an ni a; hmarchhak state dang mi eng emaw zat an tel bawk.