Tuipuiralah ráltlân 1,705 awm mek : Tun kar chhungin ráltlân an pun rin a ni

Myanmar tualchhung buai­na avangin nimin thleng khan Mizoramah Myanmar aṭanga Zo hnahthlak ráltlân mi 1,705 an awm mek. Hetih lai hian, June 25, 2021 aṭang hian inbeihna nasa zawk a awm dawna sawi a nih avangin ráltlân an pung tura ngaih a ni.

Hakha area-a Chin Defence Committee (CDC) finance secretary Henry Chinzah hnen aṭanga Vanglaini thu dawn danin, June 25 aṭangin sipai leh tualchhung mite inbeihna nasa zawk thleng turin a inmun mek avangin, Hakha area-a Zo hnahthlakte dinhmun a khirh zual zel a, nunaute chu Mizoram lamah tlânchhe turin an inhriattir a ni.

Henry Chinzah chuan, tual­chhung mite chu sipai bei lêt turin ṭan an la mek tih sawiin, "Sipai hoin min hneh tawh lo a, ni tin mai hian Kawl sipai hi 20% thi zel ang an ni. Tunah chuan thlawhtheihna hmangin beih an tum leh tawh a, chu chu keimahni Halkha area-ah a ni a. Ni 25 (June 25) aṭang chuan district tin hi beih vek an tum tawh a ni," a ti.

CDC Finance Secretary chuan, tun aṭang chuan Mizoram lamah ni tin ráltlân an pun a rin thu sawiin, "A chhan chu, he lam hi ni 25 aṭang chuan district tinah, district khawpui tin tihbuai tawh tur tih a nih avangin nunau ho chu tlanchhe vek tura thupek chhuah a ni," a ti a; hripui avangin ráltlante chu duh angin Mizoram chhungah an rawn lut mai thei rih lo a, Mizoram dep ramri-ah eng emaw zat an khawsa mek tih a sawi.

Tuipuiral Group YMA hruai­tute hnen aṭanga thu dawn danin, Tuipuirala khaw hrang hrang 21-ah Myanmar aṭanga raltlan mi 1,705 an awm mek a, chu'ngte chu khuaa awm mi 1,421 leh ramhnuaia awm mi 284 an ni.

Vanglaini palai zawhna chhangin Tuipuiral Group YMA secretary B Challianngura chuan, Farkawn leh Vaphaiah ráltlânte awm lailâwkna tur siam tum a nih thu te, relief camp pangngai pawh sak an la tum thu te, ráltlân zingah ram danga chhungte nei, mi neinung deuhte pawh an awm avangin an duhthlanna angin camp-a awmtir kher an tum loh thute a sawi.

B Challianngura chuan, tuna Ṭiaua ráltlân awmte chu Farkawn khawtlangin silpauline an pêk thu te, relief camp pawh sa se, an awmna aṭanga feh theih an duh avangin Mizorama luh kher tum lo eng emaw zat an awm thute a sawi bawk. Tuipuiral Group YMA hi ṭanpuina lutte leh ṭul pawi­mawhte ngaihtuahin nimin khan Zawlseiah an ṭhukhawm a ni.

CDC finance secretary Henry Chinzah chuan, CDC chu mi tam takin hel angah an ngai tih sawiin "Hel kan ni lo a, YMA ang hi a ni mai a, Chin defence force kan ni ve mai a. Mipui kan ni tih hi mipuiin min hriatsak se, hel kan ni lo," a ti.

Kum 70 chhung sorkar thunun tawhtu sipaite chu an duh tâwkin silai mu an lo inlei khâwl tawh tih sawiin Henry Chinzah chuan, "Sipaite chu keini Hakha lama mite chuan ulhbun nen ni tin kan do chho zel chu a ni," a ti a; anmahni ṭawngṭaipui ṭhin turin Mizoram mipui a ngen.

Myanmar aṭanga râltlânte buaipuitute leh chhawmdawl kawnga Mizoram mipui chêt danah an lawm tak zet tih sawiin Henry Chinzah chuan, Siaha leh Lawngtlai lamah kar liam ta khan raltlan mi 437 an lut tih a sawi a, "Bualpui YLA-te'n theihpatawpin min lo buaipui a, lawmthu kan sawi a. Kan mamawh leina atan Siaha lama MDC-te leh Aizawl lama MLA ṭhenkhatte'n pawisa eng emaw zat min pe a, theihpatawpin min ṭanpui a, kan lawm tak zet," a ti. Mizoram media-te leh zai mite chungah an lawm tak zet thu a sawi bawk.

Tuipuirala ráltlân awm mek
# Khua Raltlan
1. Bungzung 8
2. Dungtlang 15
3. E. Chawngtui 151
4. Farkawn 595
5. Khankawn 1
6. Khawbung 158
7. Khuangleng 15
8. Khuangthing 25
9. Leisenzo 8
10. Leithum 1
11. Lianpui 8
12. Samthang 8
13. Sazep 3
14. Sesih 33
15. Thekpui 3
16. Thekte 173
17. Vangchhia 2
18. Vaphai 203
19. Zawlsei 4
20. Zawngtetui 7
Belhkhawm 1,421
Ramhnuaia awm 284
BELHKHAWM 1,705