TNT-ah Covid-19 vei mi 528 hmu Ngaihtuah awm kan awm lo - TNT

Thutak Nunpuitu Team (TNT) hmunpui, Muanna Vengah June 20, Pathiannia swab sample endik rûnpui neihah Covid-19 vei mi 528 hmuh chhuah a ni. TNT hotute chuan, hripui vei zingah ngaihtuah awm an awm loh thu an sawi.

TNT-ah hian Pathian­­ni khan Covid-19 Medi­cal Operational Team, IDSP leh mimal dam­dawi-ina laboratory technician ṭhenkhatte'n sample endik rûnpui an nei a; RAT hmanga mi 989 endikah hripui vei mi 528 hmuh chhuah niin, chu'ngte chu TNT hmunah tho khung hran nghal an ni.

Vanglaini palai zawhna chhangin TNT hotute chuan, ngaihtuahawm lutuk an awm loh thu an sawi a, "Khawsik pangngai neite chu an awm a, anni pawh ngaihtuahawm an ni lo. Nimin khan Aizawl East CMO aṭangin survey an rawn nei a, damdawite min pe a ni. Oximeter pawh Pathianni khan Dr ZR Thiamsanga'n eng emaw zat min pe," an ti.

TNT chhawmdawlna atan Committee on Utilization of Chief Minister's Relief Fund for Covid-19 ruahmannain nimin khan CM Relief Fund for Covid-19 aṭangin Rs. 3,00,000 pek a ni.

Mizoram sorkar chuan Covid-19 Medical Operational Team kaih­hruaina hnuaiah thu leh awm hma TNT vil tur a ruat nghal. TNT vil turte chu Aizawl Mayor, Aizawl DC, Aizawl East CMO, SNO, Addl. PS to Chief Minister, Aizawl City Local Council Association aiawh leh Muanna Veng Local Level Task Force aiawhte an ni.

TNT hmun hi containment zone atan Aizawl DC chuan nimin khan a puang nghal a; phalna nei lo tan luh leh chhuah phal a nih loh bakah, in hrang hranga awmte intlawhpawh phal a ni lo.

Hetihlai hian TNT chairman Sangthankima chuan June 19, 2021 aṭang khan TNT, Khuangpuilam, Kolasib a tlawh a, fimkhur thilah helai hmunah hian quarantine nghal a ni.

Kolasib DC tarlan danin, Sangthankima bakah hian TNT hmuna awmte hi home quarantine nghal vek an ni a, district magistrate aṭanga phalna nei lo tan tlawh pawh phal an ni. Home-a awm mekte chuan swab sample test an neih hma chuan an compound chhuahsan remtih a ni lo.