Covid-19 vangin mi 84 an thi tawh

Nimin khan tlai dar 5 thlengin Covid-19 vei enkawl lai mi pahnih an thi a; sorkar record angin, hripui vangin Mizoramah mi 84 an thi tawh.

Covid-19 vei State Referral Hospital (ZMC)-a enkawl lai J Ngurchhawna (83) w/o Lalrinkimi, Phullen chu Pathianni zan zanlai pelh hnu, June 21 dar 12:05 a.m. khan a thi a, nimin khan Phullen biak-inah vui a ni. Amah hi Covid-19 positive a ni tih May 11-ah hmuh chhuah niin, May 17 khan SRH-ZMC-ah dah luh a ni a, damdawi-ina thla khat chuang enkawl a nih hnuah a thi a ni.

Nimin zing dar 6:10 khan Vanlalmuana Ngente (44) s/o N Hrangtawna, Phuldungsei Vengthar pawh hripui vangin SRH-ZMC-ah a thi a, nimin tlai dar 6 vel khan SRH-ZMC aṭangin an khua panpui chauh a nih avangin he thu ziah lai hian vui hun tur sawi chian theih a la ni lo. Amah hi Covid-19 positive a ni tih June 1, 2021-ah hmuh chhuah a ni a, June 12-ah SRH-ZMC-ah dah luh a ni.