KHAWTHLIR
Pistol leh rifle man
Aizawla awm Assam Rifles-a Charlie company chuan June 19, 2021 khan Champhai district-a Lailiphaiah 9mm pistol pakhat, rifle pahnih leh a neitua puh mi pakhat an man. An thil mante hi police-te hnenah an hlan a, Champhai Police Station-ah thubuai ziah luh a ni.
RAT tih theih
Maraland Gospel Centenary Hospital, Siahaah Rapid Antigen Test hmangin swab sample endik theih a nih thu, nimin khan Health secretary R Lalramnghaka'n a tarlang. Sorkar kaihhruaina hmanga swab sample lak, data management, bio-medical waste leh thil dangte kalpui tur a ni ang.
Covid-19 sawiho
Kolasib DC Dr H Lalthlangliana kaihhruaiin nimin khan zonal executive magistrate, executive duty on Covid-19 team leader-te leh joint village task force hruaitute IPR conference hall-ah an ṭhukhawm a; Covid-19 dona atana inkhuahkhirhna kalpui dan leh vaccine pek dan an sawiho. Lawngtlai District Task Force on Covid-19 pawh an chairman Dr Andrew H Vanlaldika, bawrhsap hoin DC conference hall-ah nimin khan an ṭhukhawm a; state sorkarin inkhuahkhirhna a siam zúlzuia an district-a inkaihhruaina kalpui dan tur an sawiho a ni.
PC-in sorkar ngen
PC party chuan thuchhuah siamin, TNT, Muanna Vengah hripui vei mi 528 June 20, Pathiannia hmuh chhuah a ni chu pawi an tih thu an tarlang a; TNT-ah hripui veite enkawl tur bik doctor, nurse, damdawi, sum leh pai leh mamawh dangte a rang thei ang bera pe turin sorkar an ngen.
SRH-ah mi 10-in Ventilator hmang
State Referral Hospital (ZMC)-ah nimin khan tlai dar 5 dinhmun angin, Covid-19 vei mi 238 enkawl mek an ni a, mi 20 chu ICU-ah enkawl niin, an zinga mi 10 chu ventilator hmantir mek an ni. SRH-ZMC Bulletin tarlan danin, ward hrang hrangah hripui vei 212 enkawl an ni a, chu'ng zinga mi 74 chu oxygen pek mek an ni. Nimin khan mi 26 dah luh an ni a, mi pahnih thiin, mi 12 dam taka chhuahtir an ni thung.