Syllabus tihtlem tumna awm rih lo Fee-ah sorkar thuin zawm a hlawh

School Education minister Lalchhandama Ralte chuan, kumin academic session-ah nursery aṭanga pawl 12 zirlaite syllabus tihtlem tumna a awm rih loh thu a sawi a; school fee 70% aia sang la lo tura an ngennain zawm a hlawh thu a sawi bawk.

Vanglaini palai zawhna chhangin Edu­cation Minister chuan, Covid-19 avangin sikul a pangngaiin kal thei rih lo mah se, syllabus tihtlem tumna a awm rih loh thu a sawi a, "Tun dinhmunah chuan syllabus pumpui zir turin kan inpuahchah rih. Chutih rualin, kan hma hun hriat a ni lo a, kan boruak azirin syllabus tihtlem pawh a ṭul thei a, a ṭul dan angin kan la ngaihtuah ang," a ti.

Academic session liam ta 2020-21 chhungin Covid-19 avanga sikul kal mumal theih a nih loh avangin syllabus 30%-a tihtlem a ni. Syllabus tihtlem ni mah se, zir­laite'n an thiam ngei ngei atana pawimawhte chu paih a ni lo.

Lalchhandama Ralte chuan, online class ṭangkai taka hman tum a nih thu sawiin, "Tun dinhmuna kan tih theih pawimawh tak chu online class a ṭha thei ang bera kalpui a ni a, ṭha taka kalpui a nih theihna atan theihtawp kan chhuah zel a ni," a ti.

May 25, 2021-a School Education Minister hoa ṭhukhawm chuan sikul hrang hrangte'n online class hmanga khairual taka zirna an kalpui theih nan kaihhruaina siam tur committee an din a; Human Resource Development Board vice chairman L Thangmawia, MLA-in kaihruaiin, Committee chu June 2021 chhunga rawtna an neihte thehlut tura tih an ni.

School Education Minister chuan, zirna a pangngaia kalpui theih a nih hma chuan school fee 70% aia sang la lo tura department-in a ngenna chuan ngaih pawimawh a hlawh tih sawiin, "Sikulte'n kan ngenna an ngai pawimawh a, kan lawm hle," a ti a; sikul pakhat 80% lo la awm mah se, an hrilhfiah hnuah an fee lak zat an tihhniam leh nghal thu a sawi.