Covid-19 veite enkawl dan sawiho; Naupang enkawl tura ṭan lak ṭul an ti

Health minister Dr R Lalthangliana hoin sorkar hotute chuan nimin khan Secretariat conference hall-ah Mizorama Covid-19 veite enkawl dan an sawiho. Covid-19 léng thawh thumna thleng theiah naupangin an tuar na zual dawna sawi a nih avangin, naupang enkawl turin tun aṭanga ṭan lak a ṭul thute an tarlang.

Health Minister chuan, Mizoramah Covid-19 Delta variant a luh tawh thu sawiin, "National Centre for Disease Control, New Delhi aṭangin hriattirna kan dawng. Tun hnaiah hri kai kan neihte'n nunna an chán zing ta bawk nen, damlo kan enkawl dante uluk zawka thlirho a, a ṭul ang anga hmalak zel dan tur ngaihtuah a ṭul a ni," a ti.

SRH-ZMC-a damlo enkawltute inpekna chhuanawm a tih thu sawiin Dr R Lalthangliana chuan, "ZMC doctor ni lo, doctor dangte leh chàwl tawhte thlenga an ngaihtuahna, thâ leh zung sénga theihtawp chhuahtute chungah lawmthu ka sawi a ni," a ti a; Covid-19 damdawi hmuh chhuah la ni lo mah se, enkawlnaa ṭangkai thei nia an hriat damdawite hmuh theih dan tur leh lak luh zung zung theih dan tur ngaihtuah a ṭul thu a sawi.

Ṭhutkhawmah hian, Covid-19 vei mahni ina inenkawl (home isolation), CCC leh CCCC aṭanga damlo na zual deuh SRH-ZMC-a an phurh thlente chu an dinhmun a ṭha lo hman viau zel tih sawi lan a ni a; home isolation/home quarantine, CCC leh CCCC-a awmte chu uluk taka a khát tâwka inchîk (self-monitor) reng tur leh oxygen level (SPO2) 94% hnuai lam a nih chuan rang taka doctor hriattir a ṭul thu an sawi.

Mithiamte'n Covid-19 léng thawh thumna thleng theiah naupang, a bikin kum 10-18 inkarin an tuar na zual dawna sawi a ni a; chuvang chuan hripui vei naupangte ṭha taka enkawl turin tun aṭanga inbuatsaih leh naupangte ngaihven a ṭul thute an sawi bawk.

Meeting-a tel ZMC doctor-te chuan damlo an enkawl dan leh an buaipui dante an sawi a, "Hri inkài chhàwnin hniam lam a pan theih loh rual hian, nunna a tam thei ang ber chhanhim a pawimawh ber," an ti a; hripui vei damlo enkawlna damdawi an hman chi hrang hrang zinga damlote ṭanpui theitu damdawi hriat chian tawhte chu mamawh ang zat a rang thei ang bera lei ṭha an tih thu leh damlo enkawlnaah sorkar laipuiin inkaihhruaina a siam tharlám ber anga an kal thu an sawi.

Ṭhutkhawmah hian Covid-19 MOT Chairman, Chief Secretary, Health Secretary, ZMC doctor-te bakah, Indian Medical Association (Mizoram), Non-Government Hospital Association of Mizoram, Association of Physicians leh Aizawl Civil Hospital aiawhte an tel a ni.