NHM hnuaia thawkte'n Health dept. Hnaruakah 50% zuahsak an beisei
National Health Mission (NHM) hnuaia thawk inzawmkhawm pawl, NHM Contractual Association Mizoram (NCAM) chuan nimin khan Aizawl Press Club-ah thurthar thehdarhtute an kâwm a; Health department hnuaia hna ruak 800 chuang sorkarin a hnawhkhah turah NHM hnuaia thawk mekte tan a zatve (50%) zuahsak turin sorkar an ngen tih an puang.
NCAM president Malsawmtluanga Hauhnar chuan, NCAM-ah member 1,800 vel an awm thu sawiin, "IV grade aṭanga doctor thlengin kan awm a, kum 20 chuang thawk tawhte an awm," a ti a; sorkarin Health department hnuaiah hna 800 chuang a la thar tur chu lawmawm an tih thu a sawi.
Health department-a hnaruak 800 zinga 700 vel chu anmahni (NHM hnuaia thawkte) kaihhnawih a nih thu sawiin Malsawmtluanga Hauhnar chuan, sorkar hotute an dawr tawh a, Health Minister an hmuhnaah an lo sawiho phawt tur thu a lo hrilh tih a sawi a, "NHM hnuaia contract basis-a thawk mekte hi seniority base-in 50% tal min pe se, 100% chu mithiam tam tak ṭhangthar an awm tawh avangin kan hauh ngam bik lo," a ti.
Malsawmtluanga Hauhnar chuan, tun hmain hlawh an lâk mumal loh ṭhin avangin harsatna hrang hrang an tawh ṭhin thu a sawi a, "Tunah erawh chuan pangngai takin hlawh kan la ta a, kan lawm tak zet a ni," a ti a; a hun taka hlawh an lak zel theih nan sorkar an ngen nghal tih a sawi.
Zoram Medical College staff nurse atan an member 70 lak an ni chu lawmawm a tih thu sawiin Malsawmtluanga chuan, sorkarin regularisation scheme felfai tak siam se an duh thu a sawi a, "November 2011-ah sorkar laipui aṭangin kum 5 aia tam thawkte chu dah ngheh tura hriattirna lehkha Health department-ah a thleng a, lehkha chu chin hriat lohin bo mah se, kan hmu chhuak leh tawh a, kan kawl mek a ni," a ti a; chutih rualin, kum tam tak liam tawha mi a nih avangin hma an lak chhunzawm loh thu a sawi.
NCAM hotute chuan, Health department chu department dang ang a nih loh avangin an pawl chuan nawrh huaihawt ve a rem loa an ngaih thu an sawi a, "Hna kan chawlh chuan damlote'n an tuar dawn tih kan hria a, mipui harsatna siam lo thei ang berin hma kan la ṭhin," an ti a; a ṭul a nih chuan sorkar nawr nan nawrh an hnial loh thu an sawi tel bawk.