Kan thuchhuah dâwt a ni lo - ZLP Thupha cháwi zawk turin MNF an phût

ZPM Legislature Party (ZLP) chuan, sorkarin thermal camera panga leh ambulance a lei chungchanga tun hnaia press statement an siam chu dâwt a ni lo tih an tarlang a; MNF party chu mipui hnenah thuphá cháwi zawk turin an phût.

ZLP chuan, June 17, 2021-a thuchhuah an siam, MNF party-in rang taka an chháng nghal chu lawmawm an tih thu sawiin, "Thermal camera panga tur ni si, pali tia kan tarlan kha a lo dik lo ngei a, chhut sual palhah thupha kan chawi e," an ti. Ambulance man dik tak MNF-in press release hmanga an tarlan chu an rinhlelh ang ngeiin Assembly session-a chhànna an dawn nen a inang lo ngei tih a lan thu an tarlang.

ZLP tarlan danin, kumin March thlaa Assembly budget session-ah MLA C Lalsawivunga zawhna, Health Minister-in a chhannaah, ambulance leina atan cheng nuai 48 hman a ni tih tarlan a ni a, bungraw dang leinaah pawh thil inmil thei lo a awm nual.

Bungrua lei danah an ngaih a ṭhat loh avangin sorkar hotute kawm an tum a, an remchan loh avangin sorkar koh ei nan press release an siam ta tih sawiin ZLP chuan, "A man dik tak kan hre thei ta. Assembly session-ah ambulance pathum lei nan cheng nuai 48 hmang anga chhan a nih laiin, MNF PR aṭanga a man tak tak kan hriat theih tâk, Rs. 46,57,500 nena a inthlauhna chu Rs. 1,42,500 a ni," an ti.

C Lalsawivunga zawhna Health Minister-in a chhànnaah, 'Bullet Thermal Camera’ leh ‘Handheld camera for fever detection with tripod’ tih chiah tarlan a nih laiin, MNF PR-ah chuan bungraw dang - PoE switch leh workstation, man to tak tak turte chu tarlan a ni. Infrared thermal sensor 475 lei pawh session-a chhanaah Rs. 31,43,003 man a nih laiin, Finance department-in Health department an endiknaah chuan Rs. 30,89,732 a ni a, Rs. 53,271-in a inthlau a ni.

Assembly session-a chhannaah, NHM-in NEC aṭanga sum dawn an hmanna belhkhawm Rs. 3,79,99,871 anga tarlan a nih laiin, an sum hmanna a mal tê têa belhkhawm chuan Rs. 5,58,84,947 a tling a; a tàwpa sum hman zat an ziah (grand total) leh a mal tê têa hmanna an belhkhawm inthlauhna chu cheng nuai 178.85 a tling.

ZLP thuchhuah chuan, infrared thermal sensor leh Standard Q Covid19 Ag test kit leina rate leh sum sen zat a inmil thei lo bawk tih tarlangin, "Assembly session-a chhanna kan dawnah siamṭhat ngai a awm chuan a hnu lawkah a tihdikna kan dawng ṭhin. Health department aṭang erawh chuan tun thlengin tihdikna kan dawn theih loh laia June 18, 2021-a MNF party thuchhuahah sum hmanna dik tak ni khat chhunga kan hmu nghal thei si hian kan ngaih a tiṭha lo," a ti.

Assembly session chhanna MLA-te dawn chu nasa taka a dik loh laiin, engtin nge party lamin sum hmanna dik zawk an hriat theih bik, tih chu an zawhna a nih thu ZLP chuan an tarlang a; MNF party chu sorkar sum hman dan an hre zawk a nih chuan, cheng nuai 178 chuanga sum hmanna inmil lo tihdikna leh sorkar aiawha thupha chawina tarlang nghal turin an phût a ni.