Covid-19 dona atana mamawh a ṭul angin kan pe zel - Chief minister

Chief minister Zoramthanga chuan nimin khan Zoram Medical College (ZMC) a tlawh a; Covid-19 donaa mamawhte a ṭul anga pek zel a nih thu a sawi.

ZMC-a thawktute hmaah thu sawiin Zoramthanga chuan, tun dinhmunah mipui hriselna chu an ngaih pawimawh lian a nih thu a sawi a, "Covid-19 do letna atana mamawh hrang hrang chu sorkarin ui loin a ṭul angin a pe zel. Mipui pawh ṭangrualin, Covid fund-ah puih ngaite puihna turin an thawh khawm a ni," a ti.

Covid-19 vei hmuh chhuah thar chungchangah CM Zorama chuan, "Rilru tak chuan eng hunah emaw chuan thleng tura kan rin lâwk a ni. He hri lêng kan hriat tirh ai chuan kan inpuahchahnate a ṭha a, lo dawnsawn dante pawh kan thiam tawh. Sample positive confirm veleh enkawlna mumal tak rang taka kalpui nghal a ni hi a lawmawm," a ti a; natna veite an dam thuai a beisei thu a sawi.

Chief Minister chuan, ZMC tichangtlung turin theihtawp an chhuah zel thu sawiin, "Tun dinhmunah chuan natna hri léng vangin phai lam aṭanga endiktu lo kal turte pawh an lo kal theih loh phah a, chuti chung chuan theihtawp chhuahin tlin ang angin hmalak chhunzawm zel a ni," a ti.