Kan hun tawn mek hi intodelh tura Ṭan lâk pawimawhzia lantirtu a ni - CM

Chief minister Zoramthanga chuan nimin khan Thenzawla AH & Veterinary department hmuna Goat Breeding Farm (kèl vulhna) a tlawh a; hripui léng vanga ramin hun a tawn mek chu intodelh tura ṭan lak a ngaihzia lantirtu a nih thu a sawi.

AH&Vety Rest House-a department official-te nen an inkawmnaah Chief Minister chuan, "Mizoram hi sik leh sá, boruak nuam tak a ni a, ruahtui kan dawng ṭha a, chaw lamah intodelh a har lo. Chuvangin, tun hun hi mahni kea din chhuahna atan hman a pawimawh. Mizoramin hun harsa a tawn mek hi rilru siamṭhat nan, chaw lama intodelh a pawimawhzia zirna hun atan hmang ṭheuh ang u," a ti.

Zoramthanga chuan, hun harsa leh manganthlak tak thleng mek chu intodelh tura ṭan lak a ngaihzia lantirtu a nih thu sawiin, "Harsatna dang eng pawh lo thleng se, ei leh ina kan intodelh chuan mipui tawrhna nasa takin a ziaawm phah dawn a ni," a ti a; Mizoram chu state vannei tak, leilung nghênga eizawnna ṭha tak tak kalpui theihna a nih thu a sawi.

AH&Vety official-te chu Delhi lama central sorkar an zuk dawr hunah inthlahrung loa nawr ṭhin tura fuihin Chief Minister chuan, "Central sorkar hi state tinin chhiah kan pêk khawmte sem chhuaktu a ni a, sum kan zuk nawr hian kan pek khawm, kan chanvo kan zuk dil mai a ni," a ti.

Chief Minister hi AH&Vety minister Dr K Beichhua leh Veterinary & Fisheries Board vice chairman C Lalmuanpuia, MLA-te'n an ṭawiawm a ni.

Thenzawl Goat Breeding Farm hi ran vulhtute tan a hlâwk zawkna turin kèl lian chi thlah punna tura ruahman a ni a, NABARD-RIDF hnuaia sum hmuh hmanga siam a ni. April 11, 2019 khan Rajasthan leh Punjab aṭang­in kel chi ṭha, Sirohi leh Beetal chu 83 lak luh a ni a, May 26, 2020 khan 97 lak luh leh a ni. Kêl notê 21 hralh chhuah a ni tawh.