Ramri chungchang Champhaiah sawiho : Dan loa lut leh ruihhlo tawlh an tam

Champhai district bawrhsap Maria CT Zuali hoin nimin khan Champhai district chhung, India leh Myanmar ramri kàia khaw hrang hranga inkhuahkhirhna leh a kaihhnawih kalpui dan tur sawiho a ni. Dan loa mihring lut leh chhuak leh, bungrua, ran leh ruihhlo tawlh a tam thu an tarlang.

Ṭhutkhawmah hian ramri khâr a nih mek lai leh Free Movement Regime tihtawp lailâwk a nih laia dan loa ramri kâna thil tih a awm ṭhin thu tarlan a ni a, "Mihring lut­chhuak, bungrua leh ruihhlo lak luh tum an awm ṭhin a, khauh takin thukhat vuaa theihtawp chhuaha do tlan ni se," an ti.

Myanmar ramah Covid-19 vei an pun zel avangin fimkhur zel ni se, ramri kâna chhungkua intlawhpawh loh ni se, an ti a; ruihhlo la/tawlh ṭhin leh dan loa ramri kân luite chu VTF-te'n thuneitute hnenah thlen se, a ṭul anga hmalak ṭhin ni se, an ti bawk.

Maria CT Zuali chuan, ramri depa awm leh hripui laka fimkhur ngaih zualna hmuna awm an nih thu sawiin, "Champhai district-ah hri léng pahnih - Covid-19 leh African Swine Fever (ASF) vèn hna lungrual taka kalpui a nih bakah, tun thlenga hripui darh huk thei khuahkhirh a ni hi a lawmawm tak zet," a ti a; hma hun hriat a nih loh avangin ṭanho thiam a ngaih thu a sawi.

Champhai SP Lalrinpuia Varte chuan, village task force (VTF)-te chu sorkarin dan ang thlapa a din leh sorkar kutke ber an nih thu a sawi a, "Hetianga din in nih avangin dan tlawhchhan chung zelin hma la ang che u," a ti.

SP chuan dan bawhchhia leh ruihhlo mante chu dan hnuaia hrem an nih theih nan incident commander emaw police emaw hnena hrilh vat tur te, dan hnuaia an thuneihna leh inkaihhruainate ennawn fo a, ṭangkai taka hmang tur leh, an zahawmna leh mawina hum kawnga theihtawp chhuah turin VTF-te a chah.

Ṭhutkhawmah hian Champhai additional DC Henry C Lalrawnkima, additional SP C Lalengliana, sorkar official dang te, YMA leh Myanmar ramri bula khaw hrang hrang VTF hruaitute an tel a ni.