High Court thupek khinglet turin Kan inpeih ṭêp - EFCC Minister

Gauhati High Court, Aizawl Bench-in Mizorama lui 16 kam forest reserve ni ṭhin ṭhiahna thupek a tihchhuah chu khing lêt turin an inpeih ṭêp thu Environment, Forest & Climate Change (EFCC) minister TJ Lalnuntluanga chuan a sawi.

Vanglaini palai zawhna chhangin TJ Lalnuntluanga chuan, High Court thupek khing lêt turin theihtawp chhuaha an inbuatsaih thu a sawi a, "Páwng khin lêt mai theih a ni lo a, uluk taka case zir chianga inbuatsaih a ṭul. Kan inpeih ṭêp a, kan inpeih veleh kan khing lêt nghal ang," a ti.

EFCC Minister sawi danin, Mizo­rama lui 16 kam forest reserve ni ṭhin ṭhiahna thupek chu Gauhati High Court Single Bench siam a ni a, Division Bench-ah khin lêt tum a ni.

Hetih lai hian, Central YMA chuan High Court thupek chu khin lêt tum mah se, Mizoram sorkarin a appeal-na an registered phawt a ngaih avangin sorkar hmalakna an ngaichâng mek. Mizoram sorkarin a khin lêtna a thehluh hunah khing lettu pâwl (party)-a tel ve an dil dawn.

Tarlan tawh angin, Mizoram Chief Secretary-in August 5, 2016-a order a chhuah leh January 28, 1965-a notification a tihchhuah, The Mizo District (Forest) Act, 1955-a Section ṭhenkhat chu mi 681-in Gauhati High Court, Aizawl Bench-ah an khing a ni.

The Mizo District (Forest) Act, 1955 chungchanga sorkar order leh notification chu High Court-in a tibo a, chuvang chuan Tuirial Hydro Electric Power siamnaah mi 681 hnenah zangnadawmna cheng nuai 3,000 chuang Mizoram sorkarin a sèn belh a ngai dawn a ni.