KHAWTHLIR

Kawng laih chah phalna titawp dawn
PWD, Aizawl Road North leh South division hnuaia road cutting (thil phûmna atana kawngpui tan tlanga laih chah) permit pek ṭhin chu fûr ruahtui a tlâk tawh avangin July 1, 2021 aṭangin khâr a ni dawn. PWD hotute chuan, kawngpui laih chah tur hmanhmawhthlak neite chu June thla chhung ngeia inchinfel a nih theih nan dilna siam turin an hriattir a ni.

ICU-ah mi 24 awm
State Referral Hospital (ZMC) ICU-ah Covid-19 vei mi 24 an awm mek a, chu'ng zinga pakua chu ventilator hmanga enkawl an ni. SRH-ZMC Bulletin tarlan danin, SRH-ah hian nimin khan hripui vei mi pakua dah luh an nih laiin, mi 21 chhuahtir an ni a, hmun dangah mi 24 sawn an ni. Nimin tlai dar 5 dinhmun angin, hripui vei mi 207 enkawl mek an ni a, mi 183 chu ward-ah awmin, an zinga 64 chu oxygen pek mek an ni.

MSU-in FIR thehlut
Mizo Students' Union (MSU) chuan MSU hming hawha dan loa thil phurtute lakah June 21, Thawhṭanni khan police station-ah FIR a thehlut. MSU chuan, June 21, 2021-a Farkawn daia Assam Rifles-in an man, dan loa thil phurtute'n MSU anga inchhálin, Myanmar ráltlân ṭanpuina tur angin an insawi niin an tarlang.

Serchhip SP kâwm
MZP Headquarters, Serchhip hruaitute chuan nimin khan Serchhip SP Stephen Lalrinawma chu a pisaah an kâwm a; Serchhip khawpuiah ILP nei lo hnam dang eng emaw zat an awma an hriat thu leh hnam dang mi dan loa sumdawnna kalpui an awm chungchang an thlen.

Containment zone
Dawrpui venga chhim lam hmun ṭhenkhat chu Aizawl DC-in containment area-ah a puang. Dinthar, Saron Veng leh Rangvamual hmun ṭhenkhat, containment area-a puan tawh chu hripui léng a ziaawm avangin containment zone a nihna hlih a ni thung a; Saron Veng hmun ṭhenkhat erawh chu containment area a la ni chhunzawm thung. Kolasib DC pawhin Golgotha Camping Centre, Vairengte leh a chhehvel chu containment zone a nihna nimin khan a hlîp.