Hmun hrang hrangah ṭanpuina pe chhuak

Nimin khan mipui thlan tlin ram hruaitute leh pawl ṭhenkhatin hmun hrang hrangah ṭanpuina leh chhawmdawlna an sem.

Deputy chief minister Tawnluia chuan hripui vên nan a bial chhunga Khawzawla Veterinary Hospital hnenah ASF test kit leh sodium hypo­chloride eng emaw zat a pe a, Khawzawl Hospital-ah Guwahati-a a siamṭhattir Truenat extractor a hlân nghal. Mualvawm Park leh a chhehvela phun tur thing ṭiak (Ashoka tree) eng emaw zat a thawn nghal bawk.

AMC Ward-XIV councillor Ramthanzauvi chuan nimin khan Civil Hospital, Aizawla ambulance khalhtu mi 17 hnenah Rs. 1,000 ṭheuh a hlân a, "Hripui lên laia hah berte zinga mi chu Covid-19 duty ambulance driver-te an ni a, mahni inah pawh awm hman loin, tlaivara chêt chhuah cháng an ngah em em a, an hah tak meuh. Driver-te hian fak leh chawimawi an phû a ni," a ti.

BJP, Mizoram Pradesh president Vanlalhmuaka, spokeperson K Laldinthara leh hruaitu dangte pawhin nimin khan TNT, Muanna Veng hnenah oxygen concentrator, steamer, alu leh dailuah ṭhahnem tak an pe bawk.