Aizawl Sahuanah sakei dah tum a ni

Environment, Forest & Climate Change minister TJ Lalnuntluanga chuan nimin khan Sakawrtuichhun rama Aizawl Zoological Park a tlawh. Sahuanah hian sakei dah tum niin, a dahna tur chei ṭhat mek chu Minister hian a enfiah a, sahuan chhungah thing a phun bawk.

TJ Lalnuntluanga chuan, Aizawl Zoological Park tihhmasawn zel tum a nih thu a sawi a, "Hun remchang hmasa berah department hotute nen a hmunhmate tlawhin, thil tih dan tur a hmunah ngei sawiho turin ruahmanna siam a ni ang," a ti.

EFCC Minister hian Zoological Park-a sakei dahna tur (enclosure) chei ṭhat mek a tlawh a, chei ṭhat zawh ṭêp tawh niin, kumin chhungin sakei dah hman beisei a nih thu an sawi. Aizawl Zoological Park hi Covid-19 léng avangin mipui tan tlawh theih loha khâr chhunzawm zel a ni.