Covid-19 vangin mi pakhat thi

Nimin khan Covid-19 vei enkawl lai mi pakhat a thi a; sorkar record angin nimin tlai dar 5 thlengin Mizoramah hripui vanga thi mi 85 an awm tawh.

Lalhmingmawii Pachuau (54) d/o PC Thankima (L), Venghlui chu nimin zing dar 5 khan Covid-19 vangin State Referral Hospital (ZMC)-ah a thi a, nimin chhun dar 12 khan Aizawl Central Hall-ah vui a ni. Amah hi Covid-19 positive a ni tih June 14, 2021-ah hmuh chhuah a ni a, June 15 khan SRH-ZMC-ah enkawl ṭan a ni.

Sorkar chhinchhiah angin, Mizoramah Covid-19 vangin mi 85 an thi tawh a, nikum chhung khan mi pariat thiin, kuminah mi 77 an thi tawh. Kumin bikah chuan, January, February leh March thlaah mi pakhat ṭheuh an thi a, April thlaah mi pali leh May thlaah mi 25 an thi. June thlaah nimin tlai dar 5 thleng khan mi 45 an thi tawh a, thla a tàwp hmain hripui vanga thi an tam ber thla a tling tawh a ni.