Kum 2020-21 atana an dawn tur TNT tan cheng nuai 25 pek chhuah a ni

Urban Development & Poverty Alleviation department hnuaia kalpui National Urban Livelihoods Mission (NULM)-a Homeless com­ponent aṭangin Opera­tional and Maintenance-ah Thutak Nunpuitu Team (TNT) tan June 21, Thawh­ṭanni khan cheng nuai 25 pek chhuah a ni.

UDPA department hotute hnen aṭanga thu dawn danin, NULM hnuaiah hian home hrang hrangte hnenah sum pek ṭhin a ni. Home/centre-a awm zat azirin pawisa pek zat a danglam a, Mizoramah chuan TNT-in an dawng tam ber ṭhin. June 21-a TNT tana sum pek chhuah nuai 25 chu kum 2020-21 atana an dawn tur a ni.

Home/centre ṭhen­khat pawh kum 2020-21 atana an dawn tur pek a ni tawh a, UDPA department-in sum an la dawn kim loh avangin la pek loh an awm bawk.

UDPA department hotute chuan, TNT tana sum pek chhuah chu tun hnaia Covid-19 vei mi 528 hmuh chhuah vang a nih loh thu an sawi a, "An dawn tur ve hrim hrim a ni a, sum rawn kal hun leh thil thlen hun a innang fuh a ni. Kum 2021-22 atan chuan home-te tana sum dawn tur cheng khat mah kan la dawng lo," an ti.