OFC tihchah a nih avangin District 4-ah FIR pali thehlut tawh

Covid-19 lèn laia mobile leh internet lama harsatna awmte sukiang tura Mizoram sorkarin a din Covid Task Force on Mobile and Internet Services (CTFoMIS) chuan, optical fibre cable (OFC) tihchah chungchangah district pali-ah FIR an thehlut tawh.

CTFoMIS chairman Lalramsanga Sailo, Information & Communication Technology secretary ni bawk chuan Vanglaini palai zawhna chhangin, fibre cable tihchah a tam thu leh an ngaimawh thu a sawi a, "Fibre cable-te hi chhan hrang hrang vanga chat a awm ṭhinin a hriat a, chhan lian deuhte chu - hrui rûk duh vang te, company laka lungawi lo te, kuthlei vang te, lei laih, thing kih leh thil dang vang a ni deuh ber," a ti a; Airtel company-in an tuar nasa zual tih a sawi.

Kumin June thlaah fibre cable chat a tam zual tih sawiin Lalramsanga Sailo chuan, "Company lam chuan kháwl aṭanga a lan danin zan rei hnuah, curfew laiin tihchah a tam ṭhin tih an sawi. Hengte hi misual thil tih niin a hriat," a ti.

Service provider-te nen ṭanghoa hma an lâk thu te, police station-ah FIR file a nih thu te, tun hnai ni hnih/ thum chhungin hrui chat a awm rih loh thute a sawi a; Saitual-Kawlkulh, Serchhip-Pangzawl, Kolasib-Kawnpui leh Mamit-Rengdilahte hrui chat a tam zual thu a sawi bawk.

Tarlan tawh angin, Mizoram sorkar chuan hripui léng avanga zirlaite leh zirtirtu te, sorkar pisa leh sumdawnna hrang hrangin mobile leh internet lama harsatna an neihte sukiang turin CTFoMIS a din a; CTFoMIS chuan, OFC chat a tam avangin khaw hrang hranga khawtlang hruaitute leh mipui chu OFC venhimpuiah an lo sawm tawh a ni.

Mizo Zirlai Pawl pawhin tun hnai khan Mizorama service provider hrang hrangte chu mobile tower tam zawk bun tur leh signal ṭha zawk pe chhuak tura hmalak dan tur an sawipui tawh bawk.