District-a quarantine centre dinhmun
Lunglei district mi leh sa Goa aṭanga haw mi 37-te pawhin nimin khan Lunglei an thleng a; an awmna quarantine facility-ah mutbu, thlêng, sahbawn, toilet-a hman tur thilte leh mamawh dangte ruahmansak a ni.
Lunglei district-ah hian tun thlenga district mi leh sa tangkhang haw tawh zat chu mi 855 an ni a; khung hran mek mi 651 an awm a, sorkar quarantine centre-ah mi 403, community quarantine centre (kohhran hall)-ah mi 158 leh mahni ina inkhung mi 90 an awm.
Champhai district mi leh sa, Goa aṭanga haw thar mi 65-te chuan Champhai an thleng a, an vaiin rapid antibody test (RAT) hmanga endik niin, an fihlim (non-reactive) vek. Heng mite hi community quarantine centre (CQC) pahnih - Champhai Venglai Presbyterian kohhran hall leh Electric Veng Presbyterian kohhran hall-ahte khung hran an ni.
Goa aṭanga Khawzawl district mi leh sa haw mi 15-te pawhin nimin khan Khawzawl an thleng a, hmeichhia 13 leh mipa pahnih an ni a; an hriselna endik a nih hnuah KVK Farmer's Hostel-ah dah hran an ni. Tun dinhmunah Khawzawl district-ah hian Covid-19 hri léng vanga quarantine centre leh isolation centre-a khung hran mi 153 an awm mek.
Hetih lai hian, Lawngtlai district-a quarantine facility 11-ah nimin thleng khan khung hran mi 510 leh in lama inkhung hrang (home quarantine) mi 25 an awm mek.
Lawngtlai district-a khung hran mekte hi Delhi, Kolkata (West Bengal), Nagpur (Maharashtra) leh Raipur (Chhattisgarh) aṭanga haw mi 129-te an ni a; medical quarters, Don Bosco School, Lawngtlai College, Circuit House, Tourist Lodge leh Covid Care Centre-ahte dah an ni.