Mizo HSS-in internal mark thehlut lo; Thupha cháwina thu an tichhuak

NSUI, Mizoram State president RB Lalmalsawma chuan thuchhuah siamin, kumina HSSLC exam-ah Mizo HSS zirtirtute'n an zirlaite internal mark MBSE-a an thehluh loh avangin an zirlai 23 chu an fail phah tih a tarlang a, "Zirlai 23-te fail chhan hi zirtirtute inthlahdah vang a ni," a ti.

NSUI President tarlan danin, Mizo HSS zirtirtute'n MBSE-ah internal mark an thehluh loh vanga fail zirlai 23-te chu subject combination-ah arts, economics, computer science, mathematics, english leh Mizo subject late an ni.

Zirtirtute inthlahdah vanga zirlaite'n an tuar chu an ngaih thutak thu tarlangin RB Lalmalsawma chuan, "He thil hi a rang lama chingfel tur leh a mawhphurtu zawng chhuak a, a ṭul anga action la nghal turin sorkar thuneitute kan ngên a ni. Zirtirtute inthlahdah avanga kumpui lingleta zirlaite thawh rah engmahloa a chang ta hi thinlung takin zirlaite kan tawrhpui a ni," a ti.

Hetih lai hian Mizo HSS chuan nimin khan thupha chawina an tichhuak a; HSSLC 2021 result chhuakah an zirlai ṭhenkhatte internal mark a awm loh avangin an result hmuh tur a awm tih tarlangin, "MBSE thiam loh leh tih dik loh a ni lo. Kan sikul aṭanga MBSE-a internal mark kan thehluhah tihsual palh kan nei a, Arts with Mathematics (Section G) ho bik hi internal mark kan enter ve hmaa an mark chu MBSE lamah thehluh palh a ni a. Chuvangin, anni internal mark hi a tel ve ta lo a ni," an ti.

Mizo HSS chuan, "Kan tihsual palh avang hian Art with Mathematics naupang te, an nu leh pate bakah, result siamtu MBSE rilru kan tináin kan tibuai hle tih kan hria a, a pawi kan ti tak zet a ni," an ti a; Mathematics (Arts) zirlaite internal mark chu an pek vek thu an tarlang.