Loneitute tan supply chain siam phût

Mizoram Pradesh Congress Committee (MPCC) Communication department chuan thuchhuah siamin, Covid-19 lockdown kalpui a nih avangin, loneitute tana a rang thei ang bera thlai hralh theihna tur, supply chain siam turin Mizoram sorkar an phût tih an tarlang.

MPCC Communications department chuan, Covid-19 hripuiin Mizoramah hlet lian zawk a chhuah zel tih tarlangin, "Ni 60 chuang lockdown hian eizawnna a nghawng a, a bikin thingtlang lama loneitute a nghawng na zual hlein a lang. Loneitute’n an thlai hralhna mumal a awm loh avangin harsatna an tâwk mek. Thlai thar hun vanglai a ni a, loneitute’n an thar chhuahte suma an chantir theih nan sorkar hian a rang thei ang berin supply chain mumal tak siam rawh se," an ti.

Mizoram mipuiin thlai an ei tam - anṭam, maian, behlawi, etc. thar hun lai a nih thu sawiin MPCC chuan, "Thingtlang loneitute pawhin he hun hi nghakhlel takin an thlir ṭhin. Fûr thlai hralh chhuah hun hi loneitu tam tak nghahfâk leh sum an lak luh theihna hun ṭha berte zinga mi a ni. Ruahman lâwkna a awm loh avangin lockdown hian thlai thar supply chain a chhu chat vek tawh a ni," an ti a; loneitute thlai khawpui lamah mamawhna a san em em laiin hralh a harsat thu an sawi.

MPCC Communications chuan, khaw tam takin Covid-19 vanga buaina tawk mek Aizawl veng tam tak chu an thlai tharte a thlàwnin an pe tih tarlangin, "Vawiin thlengin tam tak a rawn lut mek zel. A dawngtute tan a lawmawm rualin, market/supply chain mumal awm se chuan loneitute’n an thlai tam tak hi sumah an chantir thei ngei ang. Loneitute inpekna hi khawpui mipuite’n a thlàwnin kan tél mek a, chutih laiin, kuthnathawktu chhungkuate sumpai dinhmun ngaihtuah tel a ṭul a ni," an ti.