Minister-in seat siam belh turin College principal-te a ngen

Higher & Technical Education (HTE) minister Dr R Lalthangliana chuan nimin khan Mizoram University Vice Chancellor leh Mizorama college hrang hrang principal-te lehkha a thawn a; kum 2021-22 academic session atan seat siam belh turin a ngen.

Dr R Lalthangliana chuan, hripui lêng avangin harsatna a thlen thu tarlangin, "Zirlaite'n an tuar nasa. Zirtirna kalphungte pawh thlak danglam a ngaih tâk hial avangin zirlaite leh zirtirtute tan pawh thil buaithlak tak a ni," a ti a; kum kal ta lamah pawh hripui avanga zirlai Mizorama hawte tan seat siam belh tura a ngenna an tihhlawhtlin sak avangin a lawm thu a tarlang.

HTE Minister chuan, "Kuminah pawh hripui léng avangin zirlai HSSLC leh degree course zote zingah kum danga phai lama zirna chhunzawm tur ang chia ngaih zirlai ṭhahnem tak chu chhuak thei loin hun khirh tak an tawng mek a ni," a ti a; zirlaite hmakhaw ngaia a theih ang anga seat siam belh dan kawng dap tur te, zirlaite beidawng leh rilru hah taka an awm lohna turin theihtawp chhuah turtein a ngen a ni.

Minister lehkha thawn hi nimin vek khan MZU vice chancellor Prof. KRS Sambasiva Rao chuan a chháng nghal a, theihtawp chhuaha hma an lak nghal tur thu a hrilh.