Khua leh veng bila inkhàrkhip Kalpui lo turin mipuite chah

Kolasib district magistrate Dr H Lalthangliana chuan nimin khan thupek chhuahin, Thingdawl Nursing School leh Polytechnic quarantine centre-a awmte zingah Covid-19 vei hmuh chhuah a nih avangin heng zirna-in pahnihte hi tlawhpawh phal a ni lo tih a puang. Khua leh veng bila inkhàrkhip puan ang chite ti lo tur­in mipui a chah bawk.

Magistrate thupeka a lan danin, The Mizoram Epidemic Diseases (Covid-19) Regulation, 2020 leh Disaster Management Act, 2005-in thuneihna a pek angin, Thingdawl Nursing School leh Polytechnic-te chu phalna bik nei leh Covid-19 kaihhnawiha duty ni lo tan tlawhpawh phal a ni lo. Thupek hian NH-54 kawngpui aṭanga Nur­sing School leh Polytechnic panna kawng péng aṭanga institution panna kawngpui dung leh compound-te a huam a ni.

Kolasib Bawrhsap hian nimin vek khan thuthar thehdarhtute kâwmin, Covid-19 hripui vei Thawhṭanni zana hmuh chhuahte chungchang a sawi a, "Heng mite hi ṭhalai taksa chak ṭha vek an ni. Mizoram an lo luh aṭangin kawng lakah châwl khawmuang loa quarantine facillity thlenpui an ni a, khawtual mi leh mi dang nena contact an neih hriat a ni lo," a ti.

State páwn aṭangin Mizo tam tak an rawn haw avangin Mizoramah Covid-19 vei an awm theia ngaih a nih thu sawiin Dr H Lalthlangliana chuan, "Hetiang hi thleng thei saa ngaih a nih avang­in engkim ruahmanna fel tak neia kalpui a ni a, thuneitute'n rua­hmanna an siam bak chu tu mahin mahni veng bilin emaw thu dang lo neih loh tur a ni," a ti a; khua leh veng bila inkhàrkhip puan ang chite ti lo turin Kolasib district mite a chah a ni.