HSSLC exam-a internal mark thehluh loh Chhui turin Education Director ruat a ni, a ṭul angin action lâk a ni ang - Education Minister

School Education minister Lalchhan­dama Ralte chuan, kumin HSSLC exam-a Mizo Higher Secondary School zirtirtute'n zirlai 25-te internal mark MBSE-a an thehluh loh chungchang chhui chiang turin School Education Director ruat a nih thu a sawi a, "Report a thehluh hunah a ṭul angin action lak a ni ang," a ti.

Nimina thuthar thehdarhtu ṭhenkhatte nen an inkawmnaah Lalchhandama Ralte chuan, June 18, 2021-ah HSSLC result tih­chhuah a nih thu sawiin, "Mizo mipui kan lawm viau laiin, tlai lamah zirlai 25 result felhlel awmah complaint a lut nghal a ni. MBSE-in rang taka buaipui nghalin, a tuk tlai dar 4 hmain Mizo HSS Principal chu insawifiah turin an hriattir a, ani pawh a insawifiah nghal," a ti.

Education Minister chuan, complaint luh tûkah MBSE-a exam buaipuitute ṭhukhawm nghalin, mi 25-te result chu an tihfel nghal thu sawiin, "Marksheet pawh download theih turin an peih nghal a ni. Distinction-ah pahnih, first division-ah 10, second division-ah 10 leh third division-ah pakhat pass-in, pahnih erawh an vanduai," a ti a; MBSE inpekna leh thawhrimna fakawm a tih thu a sawi.

Lalchhandama Ralte chuan, thil thleng chu sorkarin a ngai thu tak hle tih sawiin, "MBSE-te autonomous body an nih angin sorkarah report thehlut turin kan hriattir. Anni'n working day hmasa ber vawiin (Thawhlehni)-ah report an rawn thehlut a, official-te nen kan ṭhukhawm nghal a ni," a ti.

Minister chuan, thil thleng chhui turin School Education Director ruat nghal a nih thu sawiin, "Darkar 72 chhunga report thehlut tura tih a ni. Chhui tur zingah a tel ve theih avangin Mizo HSS Principal chu chawlh hahdamtir rih a ni a, a aiawh rih turin Education joint director Lalthanzama ruat a ni," a ti a; report a luh hunah sorkarin a ṭul anga action a lak tur thu a sawi.

HSSLC 2021 result-a thil fel tâwk lo a awm chu pawi a tih tak zet thu sawiin Lalchhandama Ralte chuan, "A tuartu zirlai leh an nu leh pate chungah thuphá ka chawi a. Principal zawng zawngte tun hnuah chuan fimkhur taka thil ti tawh tura hriattirna tihchhuah nghal a ni," a ti.

Nimin vek khan Mizo HSS principal atana ruat thar leh charge la mektu chuan charge an inhlan nghal.