Dampa Tiger Reserve-a sa kâptute man

Association for Envi­ronmental Preservation (ASEP) chuan, tun hnaia Dampa Tiger Reserve chhunga selé/ramsial, sazuk leh hauhûk kaptu mi panga chu Tiger Pro­tection Force-te'n an man tih sawiin, lawmawm an tih thu an tarlang.

ASEP tarlan danin, Dampa Tiger Reserve chhunga sa kâptute chu - Bimal Chan Chakma (26) s/o Por Chondra, Kalabu Chakma (22) s/o Ochi Chakma, Ganjahiya Chakma (24) s/o Bodal Chakma, Nilobaron Chakma (34) s/o Chaliya Chakma leh Chakma tho kum tling lo pakhat an ni a; an vaiin Andarmanik khaw mi an ni.

Mi pangate chu June 9, 2021 khan Dampa core area-ah sa pêl turin an riak lut a, June 10-ah hauhûk nufa an kâp a, June 12-ah ramsial patuai kâpin, June 14-ah sazuk (zuk-lá) an kâp leh bawk.

Dampa Tiger Reserve chhunga sa kâptute chu June 20 zing lam dar 1:10 khan Andermanik khaw péngah Tiger Protection Force-te'n an lo man a, an sa kah sate leh silaite an man nghal bawk. An man zan hian Teirei Wildlife Range lock-up-ah dah an ni a, June 21-ah Mamit District Court-ah hruai niin, Court thu angin District Jail-ah dah nghal an ni.

ASEP chuan, kumin June thla vêka Dampa ramngaw chhunga sa pêl tura lût ru ṭhin Lallen khaw mi pahnih pawh June 14, 2021 khan man an nih thu leh Mamit District Jail-ah an awm mek thu an tarlang bawk.

ASEP chuan, Dampa Tiger Reserve chhunga sa kah a ni chu pawi an tih thu sawiin, ramsa humhalhtu ni ṭheuh turin mipui an sáwm a ni.