CM-in a bial chhung a tlawh kual Theihtawp kan chhuah tlang - CM

Chief minister Zoramthanga chuan nimin khan a bial chhung fangin, Sihphir, Sihphir Venghlun, Muthi, Muanna Veng, Zuangtui, Ṭhuampui, Falkland Veng, Zema­bawk leh Zemabawk North-a task force duty-te a tlawh a; pawisa leh hmanrua hrang hrang a pe. CM chuan hripui doin theihtawp chhuah tlan zel a nih thu a sawi.

CM Zoramthanga chuan, Covid-19 léng mek laka veng mipui an him theih nana theihtawp chhuahtu task force-te fakawm a tih thu sawiin, "Indo lai kan ni a, thil awlái ni lo mah se, zâwi zâwiin kan hneh inbeisei chungin theihtawp kan chhuah tlang zel a ni," a ti a; duty-te chu harsatna an neih chuan inthlahrung loa sorkara thlen turin a chah.

Covid-19 léng thawh khatna Mizoramin a hmachhawn dan chu sorkar laipuiin a fak nia sawiin Zoramthanga chuan, "Tuna a thawh hnihna hi hmun dang ang bawkin kan la na zawk a. Chumi karah chuan tu pawh kan inngaihtuahin kan inngaihven tlang a, hri vei enkawlna CCCC kan din theite hi khawtlang, kohhran leh mipui ṭanrualna lan chhuahna a ni," a ti.

Chief Minister hian task force-te hnenah pawisa, hmai tuamna, kut tihfaina, PPE kit leh sodium hypochloride solution-te a pek bak­ah, TNT, Nausel, Tuirial leh Tuirial Airfield VTF-te hnenah pawisa leh hmanraw hrang hrang a pe a; Zarkawt CCCC a tlawh bawk.