Central Jail-ah hripui vei mi 143

Central Jail-ah nimin thleng khan Covid-19 vei mi 143 hmuh chhuah a ni tawh a, mi 141 chu jail-a tángte niin, mi pahnih chu jail-a thawk an ni thung.

Central Jail-ah hian a ṭum khatna atan May 21, 2021 khan hripui vei hmuh chhuah a ni a, chumi hnuah hmuh chhuah belh zel a ni. Hmeichhe awmna lamah Covid care centre (CCC) siam a ni a, mahse, nimin zing RT-PCR test result chhuakah Covid-19 vei mi 105 hmuh chhuah belh leh a nih avangin an leng tawh lo a, he thu ziah lai thleng hian an awmna tur hmun tihfel a la ni lo.

Jail táng zingah Covid-19 natna (symptom) lang an awm belh zel avangin swab test kalpui zel a ni a, nimin pawh khan RAT hmangin mi paliin hripui an vei tih finfiah a ni.

Hetihlai hian nimin khan Home minister Lal­chamliana hoin Central Jail-a hripui vei an pun zel avanga hmalak dan tur sawiho a ni a, Prison, DMR leh Health dept. aiawhte an tel.