Tun karah mi 1,50,000 hnenah Covid-19 vaccine pek tum a ni

Health & family Welfare minister Dr R Lathangliana chuan, Covid-19 laka invenna damdawi (vaccine) chu tun kar chhungin Mizorama mi 1,50,000 hnenah pek hman tum a nih thu leh RT-PCR lab. mobile van dinna turin sorkar laipui aṭangin cheng nuai 100 vel dawn a nih dawn thu a sawi.

Health Minister hian nimin khan Secretariat Conference Hall-ah MJA hruaitute a kawmnaah, Covid-19 vaccine pek tam chu hripui laka Mizoram mipui himna tur a nih thu sawiin, "Tun kar kal mek chhungin mi 1,50,000 hnenah hri danna pek hman tum a ni. Tuna pek dan ngaihtuahin, tun kar Thawhṭanni aṭanga Inrinni thlengin kan target hi kan phak beisei a ni," a ti.

Dr R Lalthangliana chuan, "Vaccine first dose hian hri lakah 50% velin a veng a, a bikimin 90% vel a véng. Hei vang hian tun aṭanga thla thum chhungin Mizoramah cheng zinga 75% talin hri dose khatna la thei se kan duh a, chutiang a nih chuan hri lakah kan zia viau turah kan ngai," a ti a; tun karah mi 1,50,000 hnena pek hman a ni a, chutiang zela chaka vaccine inpek theih a nih chuan, thla thum chhungin Mizoram mipui 75% velin vaccine an dawn hman an beisei thu a sawi.

Health Minister chuan, sorkar laipuia Department of Biotechnology kaltlangin RT-PCR tih theihna mobile van dinna turin cheng nuai 100 vel dawn a nih dawn thu a sawi bawk.

Inkawmhonaa Minister ṭawiawmtu Covid-19 spokeperson Dr Pachuau Lalmalsawma'n a tarlan danin, June thla kal meka hripui vei hmuh chhuah tawh mi 5,999 zinga 126 chu state páwn aṭanga rawn lut an ni a, mi 3,902 chu hripui vei nena inhnaihna nei niin, kàina hriat loh mi 1,972 an awm a ni.