MSU hruaitute thubuai tihtawp phûtin Aizawlah zirlaite'n kawng an zawh

Mizo Students Union (MSU) hruaitute'n Court-a thubuai an neih duh loh lantirna atan MSU leh Aizawl City College Joint Students Union (ACCJSU) huaihawtin nimin khan zirlaite Vanapa Hall kawtah an pung­khawm a, punkhawmna aṭangin Hunthar Venga Chakma House bul thleng kawng an zawh. An phût anga Chakma House khâr a nih avang leh Chakma Students Hostel sak chhunzawm a nih loh avangin tlai dar 2:30 velah an ṭîn darh.

MSU president Vanlalliana Khiangte chuan, Chakma-te laka Mizo zirlaite thlavang hauhtute Mizoram chhungah an him lo nia sawiin, lungchhiatthlak an tih thu a sawi a, "Hnam dangte vanga Mizo leh Mizote thubuai insiamsakna a thleng fo hi sorkar leh ram hruaitute inefiah se kan duh," a ti.

Zirlaite'n chhun dar 12 velah Chakma House an pan a, an thlen hma deuhah Aizawl SP C Lalruaia, magistrate leh MSU leh ACCJSU hruaitute chu an inbia a ni. Zirlai pawl hruaitute chuan, an thil phût - MSU hruaitute thubuai chinfel a nih loh chuan Chakma House hawn leh student hostel sak mek thawh chhunzawm an remtih loh chu a hlawhtlin leh tlin loh enfiah an phût.Magistrate leh police-te kaihhruaina hnuaiah zirlai pawl hruaitute chuan an thil phût a hlawhtlin leh hlawhtlin loh an enfiah a, hlawhtlinga an hriat vangin zirlaite an ṭîn darh a ni.

Zirlaite an ṭîn darh hma hian resolution point pahnih an pass a; chutah chuan, 'Hnam dangte vanga Mizo zirlaite leh mipuite tawrhna hi tun hnuah thleng tawh suh se,' tih leh, 'Ram leh hnam tana zirlaite'n hma an lakin, Mizoram sorkar leh police-te hian zirlaite case siamsak tawh suh se,' tihte an tarlang.

MSU hruaitute hnen aṭanga thu dawn danin, National Institute of Technology-a zirlaite thlavâng hauhna vanga MSU hruaitute thubuai chu thubuai thehluttuin a hnuhdawh avangin nimin khan Court-in a titawp a ni.

Mizo zirlai inkhel mekte Chakma-te'n kut an thlak avanga Mizo zirlaite thlavâng MSU-in a hauhna lama thil thlengah, sorkarin MSU hruaitute court case an siamsak chungchangah pawh thubuai thehluttuin a hnûkdâwk dawn. Thubuai hi Court chuan February 25, 2020 khian a ngaihtuah ang.