Thingtlanga tui connection pek dan sawiho

Lawngtlai district-a thingtlang mite tana tui thianghlim hnianghnâr ngaihtuah leh fai leh thiang­hlim taka an awm theih nana hmalakna en zui tura Public Health Engineering department (PHED) hnuaia din District Water & Sanitation Mission (DWSM) chu nimin khan a ṭum khat nan an chairman Shashanka Ala, DC hoin DC conference hall-ah an ṭhu a, hmalakna tura ruahmannate an sawiho.

Shashanka Ala chuan, "Lawngtlai district-a thingtlang khuate'n tui thianghlim hnianghnâra an hmuh theih nana ngaihtuahna kan sên tlan a ngai," a ti a; DWSM member-te chu theihtawp chhuah turin a chah.

Meeting-a tarlan danin, Jal Jeevan Mission (JJM) hnuaia thingtlang in tina tui connection - Functional Household Tap Connection (FHTC) pek turah kum 2019-20 chhungin Lawng­tlai WATSAN Division hnuai­a khaw 35-a chhung­kua (household) 4,788 tinzâwn a ni a, chhungkaw 1,093 hnenah FHTC pek a ni tawh.

Kum 2020-21 atan khaw 46-a chhungkaw 7,191 hnenah FHTC pek tum a ni a, action plan peih a ni tawh. Ruahman lâwk ang chuan, kum 2021-22 chhungin khaw 37-ah, kum 2022-23 chhungin khaw 30-ah leh kum 2023-24 chhungin khaw 10-ah FHTC pek tum a ni a; a pumpuiah Lawngtlai district chhung khaw 158-a chhungkaw 25,096 hnenah FHTC pek tum a ni.

Ṭhutkhawmah hian District Action Plan (2020-21) leh Annual Plan (2020-2024) pawm a ni bawk.