KAWHTHLIR

Joint meeting
Vawiin hian Central YMA bultumin CYMA Committee Room-ah Covid-19 donaa hmalakho dan tur ngaihtuahin páwl leh political party hrang hrang aiawhte an ṭhukhawm dawn. Sawihonaa tel tur hian CYMA chuan Mizoram Kohhran Hruaitute Committee, MUP, MHIP, MZP, MSU, MNF, MPCC, ZPM, BJP, MPC leh ZNP-te an sáwm a ni.

Tanpuina sem
Chief Minister’s Relief Fund for Covid-19 aṭanga ruihhlo ngai leh naupang enkawlna hmun hrang hrangte harsatna sukiang tura chhawmdawlna tur Champhai district tana Rs. 2,29,500 pek chhuah chu nimin khan Champhai district-a home/centre pariat hnenah sem a ni.

NSUI lawm
Congress party hnuaia zirlai pawl National Students Union of India (NSUI), Mizoram chuan thuchhuah siamin, Mizo Higher Secondary School hotute'n an zirlaite internal mark MBSE hnena an thehluh loh chungchang chhui chiangtu tur Education Minister-in a ruat chu lawmawm an tih thu an tarlang a, chhui tura ruat Education Director chu dik tak leh huaisen taka chhui tur leh thil tisualtute hrem ngei an phût thu an sawi.

Hmalakna sawiho
Mizoram State Health Society Executive Committee vawi 25-na chu an chairman R Lalramnghaka, Health secretary hoin nimin khan Secretariat conference hall-ah an ṭhu. Ngawr (TB), sikserh, hepatitis, phár leh hri vênna pek chungchanga hmalakna tur te, natna inkai chhawn theih loh (non communicable disease) hrang hrang chungchang te, nu leh nausén, naupang leh tleirawl hriselna kawnga hmalakna turte an sawiho a ni.

Endik dan tur
Kolasib DC chuan, mipui ni tin mamawh phur ni lo lirthei dang hmanga Mizorama lutte swab sample endik dan tur a tichhuak a; Phaisen gate/entry point-ah Thawhṭanni chawhma dar 10 aṭanga zan dar 6 inkarah leh Saiphai gate/entry point-ah Thawhlehni zing dar 8 aṭanga tlai dar 4 inkarah test tur a ni. Essential commodity phur lirtheite luh dan chu kal dan ngai anga kalpui tur a ni thung.