Hripui vei TNT aṭanga tlan chhuakte dah lêt

TNT, Muanna Venga Covid-19 vei, an hmuna community covid care centre (CCCC)-a awm lai mipa 10 chu Thawhlehni zan khan an tlan chhuak a, nimin khan an awmna ngaiah dah lêt leh nghal an ni.

Thu dawn danin, June 20, 2021-a TNT-a swab sample endik rûnpui neihah hripui vei mi 528 hmuh chhuah a nih hnuah TNT chhungah CCCC siam nghal a ni a, chutah chuan hripui veite chu awmtir an ni. Thawhlehni zan zanlai pelh hnu, dar 12:30 vel khan Judo Hall CCCC-a awm mipa 10 chu bangah uai thlain an tlan chhuak a ni.

Tlân chhuakte chu - Bungkawn, Dinthar, Kanan Veng, Muanna Veng, Ramhlun South, Tuikual South, Venghlui leh Venghnuai lam mite an ni a; Venghnuai huam chhung, Taivela mual lei bula an awm laiin an zinga pahnih chuan nimin zing dar 4:30 vel khan an chhungte an bia a, an chhungte chuan an veng LTF-te hriattirin, LTF-te'n an kal chilh ta a ni. LTF-te chuan an bialtu incident commander-te an hriattir ve leh bawk.

TNT aṭanga tlân chhuakte hian TNT CCCC-ah let tawh loin, CCC emaw, anmahni venga CCCC-ah emaw awm an duh nia sawi a ni a; mahse, nimin khan TNT CCCC-ah dah let an nih thu leh harsatna an neih loh thu, incident commander Christina Lalmuanzuali chuan a sawi.

Zawhna chhangin Incident Commander chuan, TNT aṭanga tlân chhuakte chuan mi dang hnaih an nei loa an hriat thu a sawi bawk.

TNT-ah hian swab test tih chhunzawm zel a ni a, June 20-a endik rûnpuia negative, symptom nei site chu Thawhlehni khan endik nawn niin, an zinga 16 chu an positive tih hmuh a ni. Nimin thleng khan TNT hmunpuiah hian Covid-19 positive 563 an awm mek a, khawsik leh oxygen level hniam an awm nual a, mahse, buaipui ngai lutuk an awm lo nia thu dawn a ni.