Thingtlang mite an luang chhuak

Mizorama khaw eng emaw zat chuan Aizawl leh khaw dang ṭhenkhatah luan chhuah hun an hmang chhunzawm zel a, tun hnaiah pawh khaw ṭhenkhat chuan an thlai tharte thawh khawmin, khaw dang tan an pe.

Phulpui khawtlang chuan Join Committee huaihawtin mipuiin an thawh khawm thlai chi hrang hrang nimin zing khan Aizawla ITI Veng khawtlang hnenah an pe. Ṭanpuina an pekte hi chawhmeh thlai chi hrang 27 leh kurtai eng emaw zat a ni a, a vaiin Pik-up paruk leh maxicab pakhat phur a ni.

Nimin vêk khan Khanpui khawtlang chuan Nursery Veng, Aizawl hnenah chawhmeh thlai chi hrang 31 ṭhahnem tak leh ar pum eng emaw zat an pe a, Pik-up pali phur a ni. Nursery Veng khawtlang pawhin an lawmzia lantir nan Rs. 20,000 an lo hlan let ve bawk.

Ngopa khawtlang chuan June 22, Thawhlennia a khaw nâwta chawhmeh lâk rûnpui an neiha thlai chi hrang hrang an lak khawm - Pick-up pahnih leh 407 truck pathum phur chu nimin zing khan TNT, Muanna Veng, Central Jail, Ṭawngtai Bethel Camping Centre leh College Veng hnenah an hlan. Chawhmeh phurhna atan hian bialtu MLA L Thangmawia'n lirthei a ngaihtuahsak a ni.

Tun hnaia Covid-19 vei hmuh chhuah tamna leh containment zone-a puan mek Siaha district-a Saikao (Serkawr) khua hnenah Myanmar ramri depa awm Lôpu khua chuan June 22, Thawhlehni khan Tlôsai Saikao Welfare Committee kaltlangin bawng pakhat, buhfai quintal ruk leh thlai ṭhahnem tak, Pik-up panga phur an pe a ni.