Khauh lehzualin SOP kenkawh tum a ni - Kolasib DC

Kolasib district bawrhsap Dr H Lalthlang­liana chuan nimin khan a pisaah thuthar thehdarhtute a kâwm a; Covid-19 hripui darh zel tur vênna atana sorkarin inkaihhruaina a siam (SOP) chu khauh lehzuala kenkawh tum a nih thu a sawi.

Dr H Lalthlangliana chuan, tualchhungah hri inkai darh a awm tawh vangin mipui fimkhur a ngaih thu sawiin, "Kan district-a ni 20 chhunga hri inkài dan kan thlir lêt a, a hmasa ni 10 khan ni tin hripui vei mi 16.7 an awm laiin, a hnuhnung ni 10 chhungin ni tin mi 17.4 an awm, hripui kai tlemin a sang hret a ni. Hei vang hian hripui kai tihniam turin executive duty tichak ila kan ti a ni," a ti.

Khawtual mite chu intlawhpawh lo tura chahin Kolasib DC chuan, "Mipuite in lama intlawh tel tel an awm thar a, fimkhur thar leh turin kan chah a ni. European Championship khelh lai a ni a, mahni chhungkua ringawta en loa ṭhenawm khawvengte nena en an awm nual a, hei hian hripui inkai darh theihna a siam thei," a ti a, task force-te chu an vengah ṭheuh ṭan la zual turin a chah a ni.

Kolasib DC sawi danin, quarantine centre aṭanga tlanbo tumte'n bungrua (kawngkhar, tukverh, etc) an tichhe ṭhin a, chu'ng mite chu hrem ṭhin an ni. Hremna sang ber Rs. 5,000 chawi pawh an awm nual tawh. Quarantine facility aṭanga tlanbote pawh hrem zel tum a ni bawk.